Uzaq merzimdi josparlaý báribir de qajet edi. Dál osy tusta aıaǵyn táı-táı basqan Táýelsiz Qazaqstanǵa yqpal etetin 20 syn-qater saraptalyp taldandy, sheshý joldary qarastyryldy. Deni saý ult, bolashaq urpaq úshin Semeı ıadrolyq polıgony jabyldy. Tıimdi memleket bolý maqsatynda barlyq baǵyttardy qamtyǵan 1997 jyly dúnıege kelgen, 25 basty nátıjemen óz qajetin merziminen áldeqaıda buryn ótep, keregesi keńeıgen álemdegi aldyńǵy qatarly ozyq otyz eldiń qataryna enýge erekshe yqpal etken - 2050 strategııalyq qujaty qabyldandy. Elimizde turatyn kóp ultty qazaqstandyqtardyń múddesin kúıtteıtin, Qazaqstan Halqy Assambleıasy qurylyp, 2007 jyly QR Parlamenti Májilisine 9 depýtatyn saılady. Qazaqstan halqy Assambleıasynyń qurylýy ulttar birliginiń etalony sanaldy. Ata zańymyz qabyldanyp, ýaqyt talabyna saı ózgerister men tolyqtyrýlar engizildi. Ulttyq valıýta teńgemizdi qolymyzben ustap, zeınetaqy reformasy jasaldy. Kópqyrly syrtqy saıasattyń arqasynda deńgeıi bıik saıası dıalogtar óz jemisin berdi. Qazaqstannyń bitimger fýnksııasyn oryndaýy sonyń aıǵaǵy. Sondaı-aq, EQYU-daǵy tóraǵalyǵy eldi álemge tanytýdyń joǵary baspaldaqtary edi. Ult jospary, Jalpy eńbek qoǵamyna qaraı 20 qadam baǵdarlamalyq qujaty eńbek adamynyń qoǵamdaǵy ornyn belgiledi. Otanshyldyq sezimdi nyǵaıtý jumystary eńsesi túsken elimizde qaıta qolǵa alyna bastady. Saıasat pen ekonomıka, sananyń tyǵyz úılesimdiligi úshin «Rýhanı jańǵyrý», «Uly dalanyń jeti qyry» táýelsizdikti nyǵaıtý jolyndaǵy adam kapıtalynyń jańa sapasy úshin, qoǵamdy uıystyrýdyń qýatty faktorlary tarıhty tereń taný qolǵa alyndy. Osy jetken jetistigimizdiń bári Elbasy Tuńǵysh Prezıdentimiz Nursultan Ábishuly Nazarbaevtyń eńbegi-tól týyndysy. Elbasyn qalaı maqtasaq ta, qalaı marapattasaq ta artyq emes shyǵar.
Endigi maqsat, ári Táýelsizdigimizdiń tórtinshi onjyldyǵynyń mindeti – ádiletti qoǵam men tıimdi memleket qurý. Bul jerde úsh qundylyq qatar júrip otyrady: ol – jer,til,birlik. Aıtyp otyrǵan úsh qundylyǵymyz ushtasý úshin tabıǵı otanshyldyq, ulttyq ıdeıa joǵary deńgeıde bolýy tıis. Ulttyq rýh- elimizde turatyn barsha halyqty tostastyratyn biriktirýshi. Ulttyń birligi úshin tabıǵı otanshyldyqqa tárbıeleýdiń negizi tarıhı sanany qalyptastyrý desek «Rýhanı jańǵyrýǵa» oralamyz. Azamattardyń sanasyna Uly Dala tarıhyn sińirý arqyly táýelsizdikti nyǵaıtýdyń, ulttyq rýhty kóterýdiń mańyzdylyǵyn ańǵaramyz. Bul qundylyqtar ulttyq namyspen tyǵyz baılanysty. Al ulttyq namystyń otyn aýyz ádebıetinen aıqyn kóremiz. Namysy myqty eldi eshqashan jaý ala almaǵan. Ulttyq namys árqashanda eldikpen bir uǵymda bolǵan. Álbette etnostyq sanany da esten shyǵarýǵa bolmaıdy. О́ıtkeni ózge etnostardyń ulttyq dástúrleri, mádenıeti ózderine jaqyn, óz tamyrlaryna qyzyǵýshylyq týǵyzary sózsiz. Sondyqtan, Táýelsizdiktiń nyǵaıýyna mindetti túrde etnopsıhologııa áser etetini sózsiz. Iri oıshyl Nıkkolo Makıavellı uzaq ýaqyt otarlanǵan halyqtyń sanasynda ústemdik etken halyqtyń tili, mádenıeti, keıbirde dini de saqtalyp qalady degen bolatyn. Ony qaı-qaısysymyz da moıyndaımyz.
Táýelsizdik alǵannan beri oı ózgerip, sanaǵa silkinis jasaıtyn ýaqyt týǵaly qanshama ýaqyt ótse de, memlekettik tilimizde sóıleýden keıde kesheýildep otyrǵanymyz keı óńirde baıqalady. Qazaq bolyp týylyp, qazaqsha oılaı almaý ulttyń bedelin túsiretin qasiret degen eken. Júrekten shyqqan tabıǵı otanshylyq barshamyzdyń keýdemizdi kerip turmasa, ulttyq bolmysymyzdy tikteı almaıtynymyz ashy da bolsa, bet jyrtatyn aqıqat. Osy aqıqat namyssyzdyqpen, rýhsyzdyqpen ulasyp jatqan jemqorlyqqa alyp baratyn tikeleı jol desek te bolady. Namysy joq, ulttyq rýhpen nárlenbegen, túısigi taıaz adamdar ǵana óz eliniń dúnıesine ózi qol salady.
Jaqynda Prezıdentimiz Qasym-Jomart Toqaev til jóninde «Qazaqtyń tili-qazaqtyń jany» dep aıtqan bolatyn. Kóptiń kóńilinen shyqqan qajet sóz boldy. Ult múddesiniń salmaǵy tilimizdi saqtaýǵa, rýhanı muralarymyzdyń jańǵyrýyna baılanysty. Eldiń órkendeýi úshin, Táýelsizdiktiń nyǵaıýy úshin ekonomıkany órkendetetin qyrýar qarjy ǵana emes, tal besikten bastap, jer besikke deıin ulttyq rýhtyń kóterilýi de asa mańyzdy ol atqarady. Ulttyq rýhpen jigerlengen urpaq turaqtylyqty, birlikti tý etip táýelsizdikke tirek bolmaq. Táýelsizdikti nyǵaıtatyn da osy urpaq.
Turaqtylyq, birlik demekshi, keshe ǵana Elbasy Nursultan Nazarbaev Qazaqstan halqy Assambleıasy tóraǵasy laýazymyn memleket basshysy Qasym-Jomart Toqaevqa tapsyrdy. Bul máselede úlken mán bar. Sabaqtastyq úrdisi, tereń oı, úlken senim jatyr. Bul búkil Qazaqstan halqyn memleket basshysynyń tóńiregine shoǵyrlanýdy, birlik pen yntymaq, eldegi turaqtylyq, eldiń damý josparyn maqsat etken Elbasynyń kóregen usynysy boldy. Bul usynys- ulttar men etnostardyń rýhyn kóterdi. Al, Ulttyq rýhtyń kóterilýi – Táýelsizdikti nyǵaıta túsetini sózsiz.
Jantóreeva Kalyıma
Túrkistan oblystyq máslıhatynyń depýtaty,
«Nur Otan» partııasy Túrkistan oblystyq fılıaly tóraǵasynyń orynbasary
