«Meniń Baqytkúlden bes mınýttaı ǵana úlkendigim bar. Ákemiz júrgizýshi bolyp eńbek etti. Sheshemiz mektep dırektory boldy. Biz – olardyń tuńǵysh perzentimiz. Qazir ekeýi de zeınette. Qatarymyzdan kem qylmaı ósirip, oqytty. Ata-anamyzǵa degen alǵysymyz sheksiz. Sońymyzdan ergen inimiz bar». Bir qaraǵanda tuıyqtaý kórinetin, salmaqty da sabyrly Altyngúldiń sózin minezi ashyq-jarqyn Baqytkúl jalǵastyryp áketti.
«Jas kezimizde aýyldaǵylar bizdi shatastyryp alyp jatatyn, «Altyngúl-Baqytkúl» dep qatar aıtyp, shaqyratyn. Qazir de kıgen kıimimiz birdeı bolǵandyqtan, jumysta da ajyrata almaıtyndar bar. Kúshtik qurylym salasyna kelýimiz – bólek áńgime», degen ol qalaı stýdent atanǵandaryn kúlip eske aldy.
Qyzmet babymen áli kúnge deıin juptary jazylmaı kele jatqan qos boıjetkenniń tergeýshi bolsaq degen armanyna naǵashylary Amanjol Beısenov qozǵaý salypty. General-maıor shenine deıin kóterilgen el azamatyna eliktegenderi sonshalyq, basqa mamandyqty tańdaý týraly oılanbapty da. Mektep bitirgennen keıin Qostanaı zań ınstıtýtyna qujat tapsyryp, barlyq emıhandy kileń «beske» tapsyrady. Ustazdarynyń senimin aqtap, ınstıtýtty qyzyl dıplommen bitirgen jas mamandar joldamany Petropavl qalalyq ishki ister bólimine alady. Ekeýi de eńbek jolyn anyqtaýshylyqtan bastap, bir kabınetke ornalasady. Osy salada 15 jyl tynymsyz qyzmet atqaryp, túrli marapattarǵa ıe bolǵan.
Olar kóz maıyn taýysyp, qylmystyq isterdi tekserýmen aınalysqan, kúdiktilerdiń kinálary dáleldengen tom-tom is materıaldary arhıv sórelerinde qattaýly tur. Bes jyldan beri qalalyq ıývenaldyq polısııanyń jasóspirimder ınspektory qyzmetinde. «Daryn» lıseıi men №8 mektepke ınspektor retinde bekitilgen Altyngúl men Baqytkúldiń ár kúni qarbalasqa toly. Az qamtylǵan, turmysy tómen otbasylardy esepke alý, ishkilikke salynyp, bala tárbıesinen qol úzgen ata-analardy, ýaqytynyń kóp bóligin kóshelerde, oıyn-saýyq ortalyqtarynda ótkizýge áýes «kezbe» oqýshylardy jónge salý, tártipke shaqyrý, túrli reıdterge qatysý, túsindirý is-sharalaryn júrgizý, qorǵanshylyq jáne qamqorshylyq komıssııasynyń qaraýyna máseleler usyný sekildi qat-qabat jumystar jetip artylady.
Máselen, jýyrda Baqytkúlge sheshesi túrmede jazasyn ótep jatqan 16 jastaǵy oqýshynyń mektepke barmaıtyn beı-bereket júrisi jaıly synyp jetekshisinen shaǵym túsken. Jaǵdaıǵa qanyǵa kele, onyń ákesiniń ishkilikke salynǵany, qyzymen qarym-qatynastyń ýshyqqany sonsha – oǵan kómek berýden bas tartqany belgili boldy. Eskertý, aıyppul sharalarynan eshteńe ónbegennen keıin ákelik quqyǵynan aıyrýǵa qatysty materıaldar qalalyq ákimdik janyndaǵy kámeletke tolmaǵandar isi jónindegi komıssııaǵa jiberilip, usynys qoldaý tapqan.
Alǵa qoıǵan maqsattaryna berik, qıyndyqqa qaıysyp, eńsesi túspeıtin, ózgeristerge umtylýdan bir tynbaıtyn egizder naǵashyly-jıen aǵaıyndarǵa turmysqa shyǵyp, shattyqqa toly shańyraq qurǵan. Altyngúl Erlanǵa turmysqa shyǵyp, úılený toılary 2001 jylǵy 21 qańtarda ótti. Eki jastyń otaý qurý qýanyshyna jıeni Sanat ta ortaqtasyp, sonda Baqytkúldi bir kórgennen unatyp qalady. Sóıtip ekeýi kóp keshikpeı, 4 aqpanda otaý qurady.
Qos otbasyny polıseıler áýleti deýge bolady. Erlan – oblystyq qylmystyq atqarý júıesi departamenti Qyzyljar aýdandyq probasııa qyzmetiniń bólim bastyǵy, polısııa podpolkovnıgi. Sanat kóp jyl ýchaskelik ınspektor bolyp eńbek etti. Búginde zeınetker. Polısııa maıory. Al egiz polıseı arýdyń inileri Rýslan – «Kúzet» qyzmeti Aqqaıyń aýdandyq bólimshesiniń mamany.
«Aǵaıyndy jigitterge turmysqa shyqqanymyzǵa ókinbeımiz. Bir-birimizdi túsinisip, baǵalaǵandyqtan, tatý-tátti otbasymyz. Ul-qyz ósirip otyrmyz», degen aıaýly analar ózderine senip tapsyrylǵan ýchaskede mártebeli qyzmet jaýapkershiligin erekshe sezinip, bilimdi de bilikti tártip saqshylary qatarynan kórinip keledi.
О́mir ESQALI,
jýrnalıst
Soltústik Qazaqstan oblysy
