– Bir aptadan soń jalaýy jelbireıtin Olımpıadaǵa shyraıly Shyǵystan on atlet qatysady, – dedi bizben tildesken Shyǵys Qazaqstan oblystyq dene tárbıesi jáne sport basqarmasynyń basshysy Dosjan Ýálhanov. – Olar: Olga Rypakova (úsh qarǵyp sekirý), Nadejda Dýbovıskaıa (bıiktikke sekirý), Erlan Serikjanov (dzıýdo), Aleksandr Kýlıkov (eskek esý), Rýslan Kýrbanov (semserlesý), Janna Mamajanova (5 myń jáne 10 myń metrge júgirý), Nursultan Tursynov, Danııar Qaısanov (grek-rım kúresi, erkin kúres), Margarıta Torlopova (baıdarka jáne qaıyq esý), Ekaterına Smırnova (eskek esý). Amanshylyq bolsa, taǵy bir talantty sýǵa júzýshi Aleksandr Varakınniń áne-mine joldamaǵa ıe bolatyn túri bar. Al Paralımpııa oıyndaryna Nuraly Sovethanov attanady. Ol qazir Qyrǵyzstanda jattyǵýda, Tokıoǵa sol jaqtan birden barady.
– Kimderden úmit kútesiz?
– Olımpııa oıyndarynyń úsh dúrkin júldegeri, altyn qyzymyz Olga Rypakova babynda. Olgany jubaıy, bapkeri Denıs Rypakov bastap barady. Baǵy jansa tájirıbeli qyzymyz bir medalǵa ıe bolar degen úmittemiz. Elimizdiń Kók baıraǵyn ustap shyǵatyn Olgadan tórtinshi medal kútelik. Bıiktikke sekirýshi Nadejda Dýbovıskaıa Azııa rekordyn jańartqan. Onyń kórsetkishimen Olımpıadada top jarǵan sportshylar bar. Demek, Nadejda da jerge qaratpas. Al balýandarǵa kelsek, jerebe sátimen tússe, medal buıyryp qalýy ǵajap emes. Dzıýdoshy Erlan Serikjanov – talantty balýan. Semserlesýshi Rýslan Kýrbanovtan da úmittenemiz. Ekaterına Smırnova (Lýkıcheva) sonaý Beıjiń Olımpıadasyna qatysqan tájirıbeli sportshy. Baǵy jansa, jaqsy nátıje kórseter degen oıdamyz. Qoryta aıtqanda, Shyǵystyń shymyr ul-qyzdary bul joly da namysty janyp, Kúnshyǵys elinen abyroımen oralar degen úmit bar. El táýelsizdiginiń 30 jyldyǵyna laıyqty tartý jasasaq deımiz, – dep aǵynan jaryldy Dosjan Nurbaıuly.
Dáıim aıtqany kelsin!
Ońdasyn ELÝBAI,
Qazaqstannyń qurmetti
sport qyzmetkeri
О́SKEMEN
