Májilistegi Nur Otan partııasy fraksııasynyń músheleri Aıdos Sarym, Syrym Adambaev, Artýr Platonov, Bekqalı Torǵaev jáne Qanat Nurov Almaty qalasynyń Naýryzbaı aýdanyndaǵy Ala Estate shaǵyn ónerkásiptik parkine baryp, partııanyń saılaýaldy baǵdarlamasynyń oryndalý barysyn qadaǵalady.
Qalada jumys istep turǵan ónerkásiptik bazalar negizinde ónerkásiptik parkter qurý jáne jańa óndiristik úı-jaılar salý Jol kartasyna engizilgen. 300-ge jýyq jobany júzege asyrý almatylyqtar úshin 25 myńnan astam jumys ornyn ashýǵa múmkindik beredi. Bul maqsatqa 18,2 mlrd teńge bólindi.
Depýtattar Almatydaǵy shaǵyn jáne orta bıznesti qoldaýǵa baǵyttalǵan is-sharalardy oń baǵalady. Bıyl Naýryzbaı, Túrksib jáne Alataý aýdandarynda josparlanǵan 5 ónerkásiptik parktiń 4-i jumysqa kirisken.
Naýryzbaı aýdanynda jıhaz, kondıterlik jáne galantereıa buıymdaryn, keńse taýarlaryn, maskalar men azyq-túlik qaptamalaryn shyǵaratyn 9 óndiris orny ashylyp, 120 turaqty jumys orny qurylǵan. Kásipkerler alańdardy jalǵa alý boıynsha usynylǵan sharttarǵa rıza ekenin jetkizip, bul qajetti ónimdi shyǵarýdy ýaqtyly retteýge múmkindik beretinin aıtty.
О́z kezeginde depýtat Bekqalı Torǵaev jalaqynyń turaqty túrde tólenýi, jumys isteý úshin jasalǵan jaǵdaı jáne atalǵan ónerkásipke 2 %-dyq nesıe berilýi shaǵyn jáne orta bızneske baǵyttalǵan memlekettik qoldaýdyń kúsheıgenin kórsetetinin aıtty.
– Búginde Almaty – elimizdiń iskerlik astanasy, Qazaqstannyń ekonomıkalyq damýynyń iri lokomotıvi, Ortalyq Azııa óńiriniń negizgi kólik-logıstıkalyq toraptarynyń biri. Álemniń úzdik megapolısteriniń qataryna kirýge degen umtylys jylyna keminde 5% ekonomıkalyq ósýdi qamtamasyz etýdi talap etedi. Buǵan eńbek ónimdiligin arttyrý arqyly ǵana qol jetkizýge bolady, – dep atap ótti Aıdos Sarym.
Májilismender shaǵyn jáne orta bıznesti damytý – Nur Otan partııasynyń jáne Qazaqstannyń jańa ekonomıkalyq baǵytynyń negizgi basymdyqtarynyń biri ekenin atap ótti. Elimizdiń árbir úshinshi kásiporyny Almatyda jumys isteıdi, jumyspen qamtylǵan 10 azamattyń 6-y shaǵyn jáne orta kásipkerlik salasynda eńbek etýde.
Aqmola oblysyna sapary barysynda depýtat Erlik О́mirǵalı Qaraózek kentiniń turǵyndarymen kezdesti. Aýyl turǵyndary bul eldi mekenniń irgesinde el astanasy bolǵandyqtan, bolashaǵy zor ekenin aıtady. Bilim alyp, oqýlaryn bitirgen jastar da týǵan jerge oralyp, kásip ashyp, eńbek etýde. Aýylda kóptegen ınfraqurylym saqtalǵan. Orta mektep, mádenıet úıi jumys istep tur. Degenmen, aýylda sheshilmegen ózekti máseleler de bar.
– Biz turǵyndardan bilgenimizdeı, munda aýylǵa qatynaıtyn jol joq, aýyz sý tapshylyǵy bar. Medısınalyq jáne polısııa pýnktteriniń jumysyn jaqsartý jaıy da kún tártibinde tur. Ǵalamtor jelisin ornatý da kerek. Osy máselelerge qanyǵyp, aýdan ákimimen birlesip sheshýge tyrystyq. Jol, sý jáne ǵalamtor máseleleri ákimdiktiń qarjylandyrý arnasy arqyly sheshiletin boldy. Oblystyq densaýlyq saqtaý basqarmasy medısınalyq pýnktti jaqyn eldi mekenge ornalastyrýdy óz baqylaýyna aldy. Al polısııa pýnkti osy aýyldyń ózine kóshiriledi. Sebebi bul aýyl okrýgtegi eldi mekenderdiń dál ortasynda ornalasqan. Mektep ǵımaratynyń shatyryn jóndeý de sheshimin tabatyn boldy, – dedi Erlik О́mirǵalı.
Depýtat Berik Dúısembınov Qyzylorda oblysynyń Aral, Qazaly, Jańaqorǵan aýdandarynyń shalǵaı ornalasqan Bógen, Jańaqurylys, Sháken, Asqar, Kóktóbe aýyldary men Jańaqorǵan kentine, Keıden aýyl okrýgine baryp, aýyl turǵyndarymen, kásipkerlermen, malshylarmen júzdesip, jergilikti jerdegi túıtkildi máselelerge nazar aýdardy.
Kezdesýde aýyl turǵyndary bıylǵy qýańshylyq, jaıylymdyq, shabyndyq jerlerdi sýlandyrý, tórt túlik malǵa qajetti jemshóp, jol máselesi qıyndyq týdyryp otyrǵanyn aıtty.
Sapar barysynda Berik Dúısembınov Taıpaqkól, Qandyaral kólder júıesi men Basqarma, Kókaral sý torabynyń qazirgi jaǵdaıymen tanysty.
Májilismen Ilıas Býlarov Jambyl oblysynyń Merki aýdanyndaǵy «Bereke Dast» sharýa qojalyǵynyń alma baǵyna jáne «Nurjan» sharýa qojalyǵyna bardy. Kólemi 20 gektarǵa jetetin alma baǵy halyq arasynda asa suranysqa ıe alma sorttaryn ósirýde.
Sonymen qatar depýtat balyq ósirýmen aınalysatyn qojalyqqa jáne kókónis saqtaý qoımasyna baryp, sharýalardyń jaı-kúıimen tanysyp, aıtylǵan usynys-pikirlerdi nazarǵa alatynyn jetkizdi.
Májilis depýtattary Qaınar Abasov jáne Syrym Ertaev Túrkistan oblysynyń Kentaý qalasyna bardy. Onda transformator zaýytynyń ujymymen kezdesip, jumysshylardyń usynys-pikirlerin tyńdady.
Kezdesý barysynda «Kentaý transformator zaýyty» AQ-tyń basqarma tóraǵasy Haırýlla Qojabaev depýtattarǵa «Jańa stanoktar men mashınalar alýǵa memleketten jeńildetilgen nesıe qarastyrylsa, monoqalalardy damytý baǵdarlamasy arqyly 1 paıyzdyq nesıe berilse» degen usynysyn jetkizdi.
Sonymen qatar óndiris ornynyń jumysshylary zaýyttarda aýyr jumys isteıtin áıelderdiń zeınet jasyn tómendetý týraly tilekterin aıtty.
О́z kezeginde depýtat Q.Abasov atalǵan usynystardy nazarǵa alatynyn jetkizip, zeınet jasyn tómendetý máselesi tereń saraptaýdy qajet etetinin, saılaýshylardyń talaptary boıynsha izdenip, jumys júrgizetinin málimdedi.
– Partııanyń saılaýaldy baǵdarlamasyn oryndaý arqyly aldaǵy 5 jylda elimizdegi belsendi eksporttaýshy kompanııalar sanyn 400-den 1000-ǵa deıin arttyrý kózdelip otyr. Sonymen birge shıkizattyq emes eksportty 2,5 ese arttyrý jospary bar. Aýyldardy aralaý barysynda kásipkerler tarapynan osy baǵytta usynystar men ótinishter jıi aıtyldy. Ásirese pandemııa saldarynan jumysy toqtap qalǵan kásiporyndarǵa memlekettik qoldaý asa qajet. Biz kásiporyndardy nesıelendirý barysyn jandandyrý úshin tıisti usynystar joldaımyz, – dedi Syrym Ertaev.
Májilis depýtattary oblysta qoǵamdyq qabyldaýlar ótkizip, Nur Otan partııasynyń saılaýaldy baǵdarlamasyn iske asyrý jónindegi Jol kartasynyń oryndalý barysyn saralady.
