Olardyń kópshiligi, 17 mıllıonǵa jýyq bala, bir jyl ishinde bir de bir vaksına almaǵan bolýy múmkin. Bul álemdegi vaksına qoljetimdiliginiń teńsizdigin odan saıyn buzady. Balalardyń kópshiligi qaqtyǵystardan zardap shekken eldi mekenderde, jetkiliksiz qorǵalǵan jerlerde, beıresmı jerlerde nemese kedeı elderde ómir súredi. Sol sebepti kóptegen medısınalyq-sanıtarlyq kómek pen negizgi áleýmettik qyzmetti ala almaıdy. Ásirese, Ońtústik-Shyǵys Azııa men Shyǵys Jerorta teńizi elderindegi balalardyń jaǵdaıy qıyn.
«Basqa elder COVID-19 vaksınasyn talap etip jatqan kezde balalar qyzylsha, polıomıelıt nemese menıngıt sııaqty aýyr, biraq aldyn alýǵa bolatyn aýrýlarǵa qarsy vaksınasııa ala almaǵan. Atalǵan aýrýlar órshıtin bolsa, onsyz da koronavırýspen kúresip jatqan densaýlyq saqtaý júıeleri qıyn jaǵdaıǵa tap boldy. Sondyqtan balalar vaksınasyna qarajat salý jáne ár balanyń alýyn qamtamasyz etý burynǵydan da mańyzdy bola tústi», dedi DDU bas dırektory Tedros Adhanom Grebresıýs.
Máselen, 2020 jyly Úndistanda 3 mln-nan astam bala dıfterııa, sirespe jáne kókjótelge qarsy vaksınanyń alǵashqy dozasyn almaǵan. Bul tizimde Pákistan, Indonezııa, Fılıppın, Meksıka, Mozambık, Angola, Birikken Tanzanııa Respýblıkasy, Argentına, Venesýela, Malı elderi bar.
