Ǵaryshkerlerge jumsaq alaqanyn jaıǵan jeruıyq – Arqalyq aýdany Maıkótov atyndaǵy keńshardyń Jurynbaı jaılaýy Torǵaı oblysynyń ortalyǵynan ońtústik shyǵysqa qaraı 58 shaqyrymda jatyr edi. Arnaıy qarsy alýshylardyń quramynda «Egemendi Qazaqstan» gazetiniń osy oblys boıynsha menshikti tilshisi retinde biz de bolǵan edik. Basylym mártebesine oraı qurysh qazaq Toqtarǵa alǵashqy suraq berý múmkindigin paıdalanyp, onyń ter jýǵan júzine masattana qarap turyp: «Qarqaralyny» shyrqadyńyz ba ǵaryshta?», deppin. «Iá, Mádı babamnyń bul ánin daýysym jetkenshe salyp baqtym ǵoı», degen ol qyransha sańq etip, kókzeńgir aspanǵa qumarta janar qadady.
Kókten áriptesterimen esen-saý túsken Toqtar aǵasyn kórgende aqyn Naǵashybaı Muqatov shabyttanyp, jyr tókken:
«Kókirek tym keremet kúı uqqandaı,
Ulǵaıdy jańalyqqa uıyp Torǵaı.
Ǵaryshqa talmaı tartqan qazaq atyn,
Tuǵyry Toqtarymnyń berik bolǵaı!»
Bul arnaýdan lázzattana kúsh jıǵan Toqtar batyr kúlimdeı túsip, kúrkireı til qatty:
– Ǵaryshtan jetken kók baıraǵyńdy qabylda, Qazaqstanym! Berik qolda bol, beıbit zamanda erkin jelbireı bershi!
Biz batyr júzinen kóz almaı, otanshyl júrektiń ystyq iltıpatyna qosa bólengendeı kúı keshtik.
Qaısar ÁLIM,
«Egemen Qazaqstan»-nyń ardageri
