Sharany QR Memlekettik Ortalyq mýzeıi dırektorynyń mindetin atqarýshy Ǵalııa Temirton ashyp: «Dástúr men ádet-ǵurypty berik ustaný, urpaqtar sabaqtastyǵyn órbitý qashanda qazaq halqyna tán qasıet bolǵan. Qazaqtyń osyndaı ózindik kelbetin beınelep, artynda óshpes mura qaldyrǵan daryndy sýretshi N. Hlýdovtyń shyǵarmalary Ortalyq mýzeı qorynyń baı qazynasy deýge tolyq negiz bar», dep atap ótti.
Kórmeniń ashylý saltanatyna qatysqan belgili etnograf Ahmet Toqtabaı, Qazaqstan Sýretshiler Odaǵynyń tóraǵasy О́mirbek Jubanııazov, basqa da ónertanýshylar dańqty sýretshiniń XIX ǵasyr men XX ǵasyrdyń basyndaǵy qazaq halqynyń dástúrli mádenıetin, turmysyn, sharýashylyǵyn beıneleýge aıtýly eńbek sińirgenine toqtaldy.
N.Hlýdov murasynyń eń mańyzdy bóligi (211 jumysy) QR Memlekettik ortalyq mýzeıiniń qorynda saqtaýly. Onyń ishinde 117 keskindeme, 39 qaryndashpen salynǵan eskız, 55 akvarel jumysy jáne 3 albom bar. Sýretshiniń «Nóser jaýyn astyndaǵy kósh», «Barymta», «Bıe saýý», «О́rmek basyndaǵy toqymashy», «Saltanatty kósh», «Alaý janyndaǵy áıel» týyndylary kópshilikke etene tanys.
Kórme ekspozısııasyna N.G.Hlýdov qylqalamynan týǵan shyǵarmalarmen qatar jeke zattary (jıhazdary, fotoapparaty, ólsheý quraldary jáne t.b.) men fotoqujattyq materıaldar da qoıyldy. Kórmeniń basty ereksheligi – alǵash ret sýretshi N.Hlýdovtyń akvareldi jumystary jáne qaryndashpen salynǵan eskızderden turatyn úsh albomy qoıylyp, atalǵan albomdardyń elektorondy nusqasy kópshilik nazaryna usynyldy.
Este bolsa, 2003 jyly Ortalyq mýzeı alǵash ret sýretshiniń óz kolleksııasyndaǵy týyndylarynan katalog-albom jaryqqa shyǵaryp, kórermenge usynǵan bolatyn. Kórme 2025 jyldyń 25 aqpanyna deıin jalǵasady.
