Oǵan oblystyq máslıhattyń hatshysy, “Nur Otan” HDP oblystyq fılıalynyń tóraǵasy Balǵalı Ordabaev, oblys ákiminiń orynbasary Roza Kemalova jáne oblystyq departamentter men basqarmalar basshylary qatysty. Qoǵamdyq keńeste sóz alǵan Aqtóbe oblysy boıynsha quqyqtyq statıstıka jáne arnaıy esepke alý komıteti basqarmasynyń esepke alý bóliminiń bastyǵy Qundyz Oljabaeva osy kezeńde sybaılas jemqorlyqqa qatysty 59 quqyq buzýshylyq tirkelgenin atap ótti. Búginde 40 is sot óndirisinde jatyr. Memleketke keltirilgen 24 mıllıon teńge zııannyń 5 mıllıon teńgesi óndirilgen. Qoǵamdyq keńeste oblystyq ishki ister departamentiniń bastyǵy Patrıs Nokın, oblystyq densaýlyq saqtaý basqarmasynyń bastyǵy Qaırat Sabyr jáne basqalary esep berdi. Sybaılas jemqorlyqqa jol beretinder arasynda ákimshilik qyzmetkerleri, sheneýnikter, polıseıler, bilim salasynyń qyzmetkerleri jıi ushyrasady.
Satybaldy SÁÝIRBAI, Aqtóbe oblysy.
Odaq tóraǵasynyń oblysqa sapary. Kókshetaýǵa Qazaqstan Kınematografıster odaǵynyń tóraǵasy, respýblıkamyzdyń eńbek sińirgen mádenıet qaıratkeri Igor Vovnıanko bastaǵan Sh. Aımanov atyndaǵy “Qazaqfılm” kınostýdııasynyń shyǵarmashylyq toby keldi. Almaty, Astana qalalarynan kelgen qonaqtar ulttyq kınonyń qazirgi ahýaly jaıynda ótkir áńgime qozǵady. Odaq tóraǵasy, rejısser Igor Aleksandrovıch qazaq kınosynyń áli de ótpeli kezeńdegideı kúı keship jatqanyn ortaǵa saldy. Áýesqoı rejısserler túsirip jatqan sapasyz dıskiler suranysqa jaýap bere almaýda. Bir ǵana jarnama sıýjetterine qyrýar qarjy jumsalatyn búgingi kúni olarǵa qatań talap qoıýdyń ózi qıyn. Memleket tarapynan bólinetin qarjy da shekemizdi shylqıtqany shamaly. Shet elden qyrýar qarjy shyǵaryp shaqyrtqan mamandardyń qolynan shyqqan dúnıeler ulttyq sıpatynan aıyrylyp, kúlkili jaǵdaıǵa dýshar etkeni málim. Qazir kúrt betburys jasaıtyn ýaqyt. Osyǵan baılanysty 2008 jyldan bastap “Ulttyq kıno kúni” aksııasy qolǵa alyndy. Kelesi, 2011 jyly osy aksııa sheńberinde Aqmola oblysynda “Balapan” halyqaralyq kınematografııalyq festıvalin ótkizý kózdelip otyr. Onyń taqyryby atynan kórinip turǵanyndaı, balalar kınosyn damytýdyń ózekti máselelerine arnalmaq.
Baqbergen AMALBEK, Aqmola oblysy.
Astyq qabyldaýǵa daıyndyq. Qyzyljar óńirinde talapqa saı jabdyqtalǵan astyq saqtaý qoımalary jetispegendikten, yrys dánin tazalaý, keptirý jaıy áli de syn kótermeıdi. Soltústiktiń astyǵyn saqtaýǵa jalpy syıymdylyǵy 3 mıllıon tonnaǵa jeteǵabyl 49 elevatordyń kúsh-qýaty jete bermeıdi. Sońǵy jyldary olqylyqtardy túzeý maqsatynda osy zamanǵy elevatorlar salý óris ala bastady. Solardyń birin “Zenchenko jáne K” komandıttik seriktestigi qolǵa alyp otyr. Jobanyń quny – 2,3 mıllıon AQSh dollary. Syıymdylyǵy – 35 myń tonna. Qurylys jumystarymen qytaılyq “Land Company” kompanııasy aınalysady. Osydan bes aı buryn Aqqaıyń aýdanynyń ortalyǵy – Smırnovo temirjol stansasynda irgetasy qalanǵan kásiporyn bıylǵy jyldyń astyǵyn qabyldaýǵa ázir etilmek. Agroqurylymnyń bas dırektory, Qazaqstannyń Eńbek Eri Gennadıı Zenchenkonyń aıtýynsha, qural-jabdyqtar AQSh-tan, Germanııadan ákelinip, 20 adam turaqty jumyspen qamtylatyn bolady.
О́mir ESQALI, Soltústik Qazaqstan oblysy.
Kórikti jarnama — kórkem til. Juma kúni A.Toqmaǵanbetov atyndaǵy mádenıet úıinde oblystyq tilderdi damytý jónindegi basqarmanyń uıymdastyrýymen “Kórikti jarnama – kórkem til” atty oblystyq baıqaý ótti. Memlekettik tildiń qoldanys aıasyn keńeıtý, jarnamalardyń qazaq tilinde jazylýy men kórkemdik sapasyn jaqsartý maqsatyn kózdegen bul baıqaýǵa qatysýshylar óz ónim túrlerin sarapqa saldy. Baıqaý qorytyndysynda “Qyzylorda dızaın” jarnama agenttigi jeńimpaz dep tanylyp, Turǵyn úı qurylys jınaq bankisi men “Kartel” baılanys júıesi júldeli oryndardy bólisti.
Erkin ÁBIL, Qyzylorda.
“Densaýlyq” poıyzy tegin qyzmet kórsetti. Respýblıkalyq “Densaýlyq” aksııasy boıynsha júzege asyrylyp jatqan dárigerlik poıyzy jaqynda О́skemenge atbasyn tiredi. Densaýlyq poıyzy quramynda tis dárigeri, terapevt, balalar dárigeri, barlyǵy 20-ǵa tarta qyzmet kórsetetin mamandar, tipti qan quramyn anyqtaıtyn laboratorııa, rentgenge túsiretin qyzmet túrleri bar. Dárigerlik kómek kórsetetin poıyz temirjolshylar men olardyń otbasylaryna tegin qyzmet kórsetti. Sosyn olar jaqyn mańdaǵy temirjol stansalary men razezderge baryp, ondaǵy qyzmetkerlerdi tekserdi. Árbir beketterde eki kún bolyp, barlyq adamdardy dárigerlik tekserýden ótkizgen aq jeleńdi abzal jandarǵa jergilikti turǵyndardyń alǵysy sheksiz.
Ońdasyn ELÝBAI, Shyǵys Qazaqstan oblysy.
Sulýaǵash aýylyndaǵy jıyn. Sarykól aýdanyndaǵy Sulýaǵash aýylynda atalar arýaǵyna arnap as berildi. Mundaı jıyn qazir kópshilikke tańsyq bolmaýy múmkin. Biraq sulýaǵashtyqtar úshin munyń mańyzy úlken. Sebebi, bul 90-shy jyldary toz-tozy shyqqan aýyldyń alǵashqy eńse kótergeni bolatyn. Aýyl azamattary A.Qasymov, H.Aldaev, Y.Dúısekeev, Q.Qarpyqov, B.Bekbolatov jergilikti ákim M.Qulymbekovtiń basshylyǵymen atalar qorymyn qorshady. Aýyldy kórkeıtý jumysyna da turǵyndar atsalysty. Asta osy óńirden shyqqan Aspantaı áýlıe, Buharanyń ámiri bolǵan Nııaz týraly A.Jolamanov aıtqan áńgime de jastarǵa qyzyqty boldy. Al kórshi Tımırıazev aýylynda “Olar jeńispen oraldy” degen máńgilik ot belgisi qoıyldy.
Názıra JÁRIMBETOVA, Qostanaı oblysy.
Kelesi kezdeskenshe, “Jasybaı tolqyny”! Baıanaýyldyń jaz kúnderiniń áserleri kóp-aq. Sonyń biri – ótken aptada Jasybaı kóli jaǵasyn qyzyqty, kóńildi, tapqyr oıyndarǵa arnaǵan qazaq KVN oıynshylarynyń basqosýy boldy. Jyl saıyn ótip turatyn tapqyrlar klýby oıynyn, ıaǵnı “Jasybaı tolqyny” atalatyn bul festıvalǵa qatysýshylardy KVN odaǵynyń prezıdenti Esen Eleýken bastap keldi. Elimizdiń ár túkpirinen – Taraz, Shymkent, Qyzylorda, Atyraý, Qaraǵandy, Jańaózen qalalarynyń jastary oıly da mándi, qyzyqty, utymdy, tapqyr oıyndarymen kózge tústi. Kól jaǵasyndaǵy merekege ana tilin súıetin jastar da kóp jınaldy. Qazirgideı qazaq tiliniń taǵdyry tarazyǵa túsip, salmaqtylyǵy ólshenip jatqan osynaý bir ýaqytta jastarymyzdyń týǵan tilderin nasıhattap, órisin keńeıtip jatqandaryna qýandyq. Bul joly astanalyq “Sparta” komandasy jeńimpaz atandy.
Farıda BYQAI, Pavlodar oblysy.
