“Salamatty Qazaqstan” baǵdarlamasy Úkimet qoldaýyna ıe boldy

Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda elimizdegi densaýlyq saqtaý isin damytýdyń 2011-2015 jyldarǵa arnalǵan “Salamatty Qazaqstan” memlekettik baǵdarlamasynyń jobasy qaraldy. Osy másele jóninde baıandama jasaǵan Densaýlyq saqtaý mınıstri Jaqsylyq Dosqalıevtiń aıtýynsha sala boıynsha osy ýaqytqa deıin jumys istep kelgen 2005-2010 jyldarǵa arnalǵan memlekettik baǵdarlama óziniń aıaqtalý saty­syn­da tur. Ol boıynsha elimizde bir­qatar jumystar júzege asty. Dári-dármekterdi jetkizýdiń biryńǵaı dıstrıbıýterlik júıesi quryldy. Medısınalyq-sanıtarlyq alǵash­qy kómekti berý isi basymdyqpen damytyldy. Elimizde 59 medı­sınalyq bilim nysany salyndy. Endi qabyldanyp otyrǵan jańa baǵdarlamada densaýlyq saqtaý isin tıimdi uıymdastyrý máselelerine, sonyń ishinde aýrýlardyń aldyn alý men salamatty ómir saltyn qa­lyptastyrý jónindegi is-sharalarǵa aıryqsha nazar aýdarylǵan. Baǵ­dar­lama alty baǵytty qamtyp otyr. Birinshi baǵyt boıynsha sek­toraralyq jáne vedomstvoaralyq is-qımyldyń tıimdiligin arttyrý kózdeledi. Iаǵnı densaýlyq saqtaý isine qatysy bar salalardyń bar­lyǵy óz jumystaryn birlesip júrgizýge mán beretin bolady. Ekinshi baǵyt boıynsha negizgi áleýmettik aýrýlar (ınfarkt, ın­sýlt, qant dıabeti, týberkýlez jáne basqalar) boıynsha aldyn alý sharalary barynsha kúsheıtiledi. Úshinshi baǵyt sanıtarlyq-epı­demıologııalyq qyzmetti jetil­di­rý­ge, atap aıtqanda sýyq tııý aýrýla­ry men ókpe qabynýyn týyndata­tyn ınfeksııalardan balalardy saqtaý úshin aldyn ala  egý ju­mys­taryn júrgizý, otandyq medısına­lyq ımmýndyq-bıologııalyq dári-dár­mekterdi óndirý maqsatyn kózdeıdi. Tórtinshi baǵyt boıynsha bir­yń­ǵaı ulttyq densaýlyq saqtaý júıesindegi medısınalyq kómekti uıymdastyrýdy basqarýdy jáne qarjylandyrýdy odan ári je­til­dirý máseleleri qamtylyp otyr. Osy úshin medısınalyq qyzmet­ker­lerdiń áleýmettik jaǵdaılaryn jaqsartýǵa, jas mamandarǵa túrli je­ńildikter berýge, kólik medı­sınasyn, sonyń ishinde avıa­sııa­lyq medısınany damytý isine mán berilmek. Besinshi baǵyt medısınalyq, far­masevtıkalyq bilim berýdi je­tildirý jónindegi sharalardy, medı­sınadaǵy ınnovasııalyq tehnolo­gııa­lardy damytý men engizýdi, medısınalyq qyzmetkerlerdiń biliktiligin arttyrýdy qamtıdy. Al altynshy baǵyt boıynsha halyq úshin dári-dármekterdiń qol­jetimdi ári sapaly bolýy kózdeledi. Baǵdarlamanyń eleýli jetistigi retinde ulttyq medısınalyq hol­dıngtiń qurylýyn aıtýǵa bolady. Sonymen qatar endigi kezekte halyqqa dárigerdi, emhanalardy óz erkimen tańdaý quqyǵyn bere otyryp, medısınalyq mekemeler arasyndaǵy básekelestiktiń artýy­na kóp kóńil bólinýde. Baǵdarlamanyń jalpy quny 445 mıllıard teńgeden astam somany quraıdy. Bul baǵdarlamany ázirleý barysynda jergilikti jerlerde bir­qatar jıyndar uıymdastyrylyp, densaýlyq saqtaý qyzmetker­leri­niń, qoǵam ókilderiniń pikirleri, usynystary eskerilgen. Gazetterde kóptegen maqalalar jarııalanǵan. Sondaı-aq Úkimet otyrysynda shyǵyp sóılegen Pavlodar qala­syn­daǵy ekinshi qalalyq aýrýhana­nyń bas dárigeri Oraz Muqashev, Almaty oblysy, Panfılov aýdan­dyq aýrýhanasynyń bas dárigeri Tóleý Sarpekov, Densaýlyq saqtaý qyzmetkerleri assosıasııasynyń basshysy Aıjan Sydyqova jáne basqalar jańa baǵdarlamanyń tıim­di jaqtary kóp ekendigin aı­typ, oǵan mysaldar keltire oty­ryp, qoldap sóıledi. Mádenıet mınıstri Muhtar Qul-Muhammed Jaqsylyq Dosqa­lıev­tiń óz baıandamasyn memleket­tik tilde jáne júıeli jasaǵandy­ǵyna rızashylyǵyn bildire kele, óńirlerden kelgen medısına mekemeleriniń basshylarynyń kópshiligi osy tilde bir aýyz sóz aıta almaǵandyǵyn synǵa aldy. Baǵdarlamaǵa qoldaý bildirdi. Talqylaýdy qorytyndylaǵan Úkimet basshysy Kárim Másimov bul baǵdarlama Úkimet músheleriniń daýys berý jaǵdaıynda qoldaýǵa ıe bolǵandyǵyn aıta kele, endi onyń Memleket basshysynyń qaraýyna usynylatyndyǵyn jetkizdi. Suńǵat ÁLIPBAI.