Yqpaldastyq arta bermek

Keshe Úkimet úıinde Premer-Mınıstr Kárim Másimov elimizge resmı saparmen kelgen Iordanııa Hashemıttik Koroldiginiń Premer-mınıstri Samır Zaıd ál-Rıfaımen kezdesip, kelissózder júrgizildi. Kezdesýden keıin taraptar BAQ ókilderimen brıfıng ótkizdi. – Elimiz úshin Iordanııa arab aımaǵyndaǵy mańyzdy strategııa­lyq áriptes sanalady, Samır Zaıd ál-Rıfaıdyń bul sapary Qa­zaqstan men Iordanııa arasyndaǵy yntymaqtastyqty odan ári da­my­týǵa serpin beretinine senimim ká­mil, – degen Úkimet basshysy Ká­rim Másimov kelissózder bary­syn­da eki jaqty yntymaqtastyq máse­leleri, onyń ishinde saýda, ekono­mıka, ındýstrııa, aýyl sharýashy­ly­ǵy, ǵylym, bilim, mádenıet, tý­rızm, farmasevtıka jáne ınves­tı­sııa salalaryndaǵy yntymaqtas­tyq­ty damytý máseleleri talqy­lanǵanyn da nazardan tys qal­dyr­mady. – Kez­desýde Elbasy Nur­sultan Nazarbaev pen Iordanııa Koroli Abdýlla ben Hýseın II arasynda qol jetkizil­gen ýaǵda­las­tyqtardy iske asyrý maqsatyndaǵy jumys baǵyttary talqylandy. Sondaı-aq halyqaralyq jáne aımaqtyq máseleler boıynsha da pikir almastyq, – dedi ol. Qazaq­stan men Iordanııa arasyndaǵy áriptestiktiń mańyzdylyǵyna erekshe toqtalǵan Úkimet basshysy onyń damý deńgeıine de óz rızashylyǵyn bildirdi. – Qazaqstan men Iordanııa ózara saýda-sattyq kólemin ulǵaı­typ, ózara ınvestısııalar tartý turǵysynda ortaq sheshimge keldi. Ekonomıka salasyndaǵy yntymaq­tas­tyqty ári qaraı damytý úshin eki el kásipkerleri arasynda jıi kez­desýler ótkeni abzal dep oılaımyn. Bul eki el kásipkerlerine ınvestı­sııalyq múmkindiktermen tanysýǵa keń jol ashady, – degen Iordanııa Hashemıttik Koroldiginiń Pre­mer-mınıstri Samır Zaıd ál-Rıfaı eki memleket basshylary arasynda qalyptasqan aıryqsha qarym-qatynastyń osy elder óz­ara baılanystarynyń joǵary deńgeıge jetýine yqpal etkenin atap kórsetip, bolashaqta da ynty­maqtastyqty odan ári damytý úshin jańa kókjıekter ashady degen úmitte ekenin jetkizdi. Elimizge resmı saparmen kelgen 44 jastaǵy Samır Zaıd ál-Rıfaıdyń eńbek joly 1988 jyldan bastalǵan. Osy jyldar Iordanııa Koroldiginde túrli laýazymdy qyzmetter atqarǵan. Al ótken jyldyń jeltoqsanynan Iordanııa Hashemıttik Koroldiginiń Pre­mer-mınıstri qyzmetinde. Arab, aǵylshyn, fransýz tilderin erkin meńgergen. Ábdirahman QYDYRBEK.