Partııa bedeli belsendilikpen keledi

“Nur Otan” HDP Mańǵystaý oblystyq fılıaly tóraǵasynyń birinshi orynbasary Jaýymbaı QARAEVPEN áńgime – Qurmetti Jaý­ym­­baı Amantur­ly­uly, áńgimeni “Nur Otan” HDP oblystyq fılı­aly­nyń ózderińizge qa­rasty aýdandyq, qa­la­lyq uıymdarmen jáne irgeli bastaýysh uıym­dar­men ózara baılanysynan, sondaı-aq sabaq­tastyǵynan bastasańyz. – “Nur Otan” halyqtyq-demokratııalyq par­tııa­sy ózi ómirge kelgen kúnnen bastap-aq, ata-babalarymyz ǵasyrlar boıy arman etip, kúreske toly ǵumyr keshe júrip qol jetkizgen táýel­sizdigimizdiń tutqasyn nyqtap, tuǵyrtasyn bekitýdi, elimizdiń jan-jaqty damýyna úles qosýdy, adamdarymyzdyń qamsyz turmysyna qol jetkizýdi basty murat-múddesi sanap keledi. Osy maqsattar jolynda partııamyz qarapaıym adamdar sanasyn burynǵy buıyǵy qalyptan aryltyp, Elbasy saıasatynyń basty baǵyttaryn jetkizýde úlken jumystar atqarý ústinde. Keńestik josparly ekonomıkadan naryqtyq qatynastarǵa kóshken kezeńdegi qym-qýyt qıyn­dyqtar, el ishindegi kúrdeli áleýmettik jaǵdaı bá­rimizdiń de esimizden shyǵa qoıǵan joq. Osyn­daı syn saǵattarda qoǵamdy alǵa tartatyn áleýet­ti qozǵaýshy kúsh qajettigin ómirdiń ózi talap etti. Elimizdiń san myńdaǵan azamaty Mem­leket basshysynyń ishki jáne syrtqy saıa­satyna, táýelsizdigine jańa ǵana qol jetkizgen jas memleketti jan-jaqty damytýdyń kók­jıek­teri kózdelgen “Qazaqstan-2030” Strategııalyq baǵ­darlamasyna qoldaý bildire otyryp, belgili bir saıası uıymnyń aıasyna birigip, búgingi “Nur Otan” halyqtyq-demokratııalyq partııasyn qurdy. Partııanyń negizi, bylaı aıtqanda, ıadrosy – eńbek ujymdaryndaǵy múddeles adamdardyń bastaryn qosyp otyrǵan bastaýysh partııa uıymdary. Sondyqtan Elbasy, partııa Tóraǵasy aıtqan tapsyrmalardyń negizgi jaýapkershiligi, túptep kelgende, bastaýysh partııa uıymdaryna júkteledi. Jáne bul tapsyrmalardy naqty iske asyratyn da halyqtyń qalyń ortasynda júrgen osy bastaýysh uıymdarymyz, qatardaǵy partııa músheleri. Osy tapsyrmalardy júzege asyrý maqsatymen bıylǵy sáýir aıynyń basynda bastaýysh partııa uıymdary tóraǵalarynyń forýmyn ótkizdik. Forýmda bastaýysh partııa uıymdary jetekshileriniń usynystary tyńdaldy, birqatar naqty tapsyrmalar berildi. Oblysta qazir 273 bastaýysh partııa uıymy, 25 myńǵa jýyq partııa múshesi bar. Bul – úlken kúsh. Osyndaı áleýetti kúshimizdi ortaq iske jumyldyryp, elimizdiń odan ári órkendeýine úle­simizdi qosý baǵytyndaǵy san alýan jumys­ta­rymyzdyń bel ortasynda bastaýysh partııa uıymdary, qarapaıym partııa músheleri belsene qatysyp júr. Olardyń qalyń buqara arasyn­daǵy belsendiligin arttyrý baǵytyndaǵy tal­py­nystarymyz da nátıjesiz emes. Aýmaqtyq fı­lıaldardaǵy, aýyl-kentterdegi qoǵamdyq-saıası sharalarymyzǵa jurtshylyq ókilderi yntamen qatysyp, kóptegen qundy usynystaryn, keıde, tipti aryz-shaǵymdaryn aıtýǵa, qoldaý-kómek suraýǵa den qoıyp otyr. Bıylǵy jyly partııa ishinde birqatar qury­lymdyq ózgerister boldy. Partııanyń oblystyq fılıaly quramyndaǵy barlyq aýdandyq, qalalyq fılıaldarymyzdyń tóraǵalary bolyp aýdan, qala ákimderi saılandy. Atqarýshy bılik organdarynyń kóshbasshy partııamyzdyń jumysyna tikeleı aralasýyna múmkindik berip otyrǵan osyndaı oń bastama, aýmaqtardyń ekonomıkalyq-áleýmettik máseleleriniń el ómirindegi qoǵamdyq-saıası mańyzyna aıryqsha kóńil bólýge mindetteıdi. Oraıy kelgende aıta ketý kerek, partııanyń bedeli men oǵan jergilikti jerlerde kórsetiletin senim árbir partııa múshesiniń, partııa qury­lymdary basshylarynyń bedelimen aıqyn­dalady. Sondyqtan bastaýysh uıymdardyń bas­shy­laryn ujymnyń ózi saılap alýyna múm­kin­dik týǵyzý jóninde usynystar berdik. Bul usy­nystarymyzdy bastaýysh uıymdar quptap-qol­dap, qazir birqatar iri kásiporyndardaǵy bas­taýysh partııa uıymdary óz jetekshilerin ujym ishinde bedeli bar, bilikti, isker de bastamashyl partııa múshelerinen saılap ala bastady. Taǵy da bir aıta ketetin jaǵdaı – bizderge júıe­li túrde partııanyń kadrlyq rezervin ja­saqtaý jumystaryna kóshý qajet dep esepteımin. О́tken mamyr aıynda partııanyń Ortalyq apparaty janynan turaqty jumys jasaıtyn Partııa mektebi ashyldy. Osy mektepke bolashaq partııa qyzmetkerlerimizdi jiberip, oqytyp, partııalyq kadrlarymyzdy nyǵaıta bermekpiz. – “Nur Otan” HDP oblystyq fılıalyndaǵy qoǵamdyq qabyldaýǵa kelýshiler bir tolas­ta­maıtynyn baıqap júrmiz. Olar sizderge úlken úmit, mol senimmen keledi. Al olardyń aryz-shaǵym, talap-tilekteriniń sheshilý jaǵy qalaı? – Partııanyń oblystyq, aýmaqtyq fı­lıaldarynda qoǵamdyq qabyldaýlar turaqty túrde ótkiziledi. 2010 jyldyń segiz aıy ishinde qoǵamdyq qabyldaý bólimderine 947 ótinish kelip tústi, bul bir aıǵa shaqqanda 118 birlikti quraıdy. 2009 jyldyń osyndaı kezeńimen salystyrǵanda ótinishter sany 1,5 eseden asyp otyr. Jurt­shylyqtyń kóshbasshy partııaǵa degen seniminiń artyp otyrǵanyn osy sıfrlardan da ańǵarý qıyn emes. Búgingi kúni barlyq ótinishterdiń 75 %-y oń sheshimderin tapty. Azamattardyń ótinishterine júrgizilgen taldaýlar aımaqtyń problemalyq máselelerin júıeleýge múmkindik beredi. Olardyń arasynda aýdan, qala ákimderiniń ózderi sheshetin máseleler de az emes. Halyqtyń problemalary ákimderdiń, oblystyq mekemeler basshylarynyń qaty­sýy­men ótetin partııa aktıviniń jınalysynda keń áńgime bolyp, olardy sheshýdiń joldary bel­gilenedi. Jergilikti ákimderge aýmaqtyq partııa fı­lıaldarynyń tóraǵalary retinde qoǵamdyq qabyldaýlarǵa jıirek qatysyp, turǵyndardy tolǵandyryp júrgen máselelerden únemi habar­dar bolyp, olardyń oń sheshimderin tabýyna ju­mys­tanýdy tapsyryp kelemiz. Árıne, turǵy­lyqty halyqtan túsken ótinishterdegi ózekti má­selelerdi júıeleý jergilikti bılik organdary qyz­metiniń tıimdiligin baǵalaýǵa da múmkindik beredi ári partııanyń aımaqtaǵy bedelin kótere túseri sózsiz. Bir sózben aıtqanda, partııanyń oblystyq fılıalyndaǵy qoǵamdyq qabyldaýlar ólke­mizdegi áleýmettik ahýaldyń aınasy deýge bolady. Sondyqtan bizder qoǵamdyq qabyldaýlardyń ómirge neǵurlym jaqyn ári tıimdi túrlerin júzege asyra bastadyq. Qazir aı saıyn derlik aýdandar men qalalarda, birqatar aýyl-kentterde kóshpeli qoǵamdyq qabyldaýlar uıymdastyryp, olarǵa oblystyq deńgeıdegi quqyq qorǵaý organdarynyń basshylaryn, jergilikti ákimderdi, depýtattardy qatystyrýdy júıeli jolǵa qoıdyq. – Osy jyldyń mamyr-maýsym aılarynda partııanyń oblystyq fılıaly “Seniń “Jemqor­lyqqa jol joq!” dep aıtýyń mańyzdy” atty sha­rany iskerlik jaǵdaıda, túrli qoǵamdyq uıym­dar­dy, quqyq qorǵaý organdaryn qatystyra otyryp, uıymshyldyqpen ótkizdi. Osyndaı aksııalary­ńyzdyń nátıjelerine keńirek toqtalyp ótseńiz? – Qoǵam ómiriniń qalypty damýyna, jalpy elimizdiń ekonomıkalyq-áleýmettik jaǵynan órkendeý baǵyttaryna zııanyn tıgizip kele jatqan asa qaýipti áleýmettik derttiń biri – osy sybaılas jemqorlyq. Partııamyz sybaılas jem­qorlyqpen kúres sharalaryn keń kólemde júrgizip keledi. Siz aıtyp otyrǵan shara solar­dyń bir parasy ǵana. Memlekettiń quqyqtyq saıasaty zań aktilerin, memlekettik basqarý, baqylaý-qadaǵalaý organdarynyń jumysyn ońtaılandyrýdy jetildirýge ǵana emes, sonymen qatar, memlekettik qyzmetke de, menshik túrine qaramastan, basqa da laýazymdarǵa da kásibı qabileti men adamgershilik qasıetterine qarap qabyldaýdyń, olardyń jumysyn qazirgi zaman talaptary tuǵysynan baǵalaýdyń meılinshe jańashyl ádisterin engizýge de baǵyttalǵan. Partııa basshysynyń tapsyrmalaryna sáıkes sybaılas jemqorlyqpen kúres jumystary qazir barynsha tıimdi deńgeıge kóterildi. Bıylǵy shilde aıynda ótken saıası keńestiń bıýrosynda laýa­zymdy qyzmette júrgen úsh partııa múshesiniń sybaılas jemqorlyqqa qatysty isteri qaraldy. Olardyń árbirine tıisti partııalyq sharalar kórildi. Sonymen qatar, quqyq qorǵaý organ­darymen birlese júrgizgen dóńgelek ústel basyndaǵy kezdesýlerimiz, birlesken reıdterimiz, josparly ınspeksııalyq tekserister óziniń oń nátıjelerin bere bastaǵanyn aıtý kerek. – Partııanyń Ortalyq apparaty janynan Partııalyq baqylaý komıteti qurylyp, onyń jergilikti bólimsheleri jumys jasaı bastaǵanyna jyldan asyp barady. Osy qurylym partııa belsendilerimen, depýtattarmen birlese jumys jasaýdyń tıimdi tásili bolǵan sııaqty... – Shyndyǵynda da partııamyzdaǵy bul jańa qurylym aımaqtaǵy óndiristik nysandardyń serpindi jumys jasaýyna, bólinip jatqan mem­leket qarajatynyń maqsatqa saı jumsalýyna partııalyq baqylaý ornatýdyń tıimdi tetigine aınala bastady. Prezıdenttiń “Jol kartasy”, “100 mektep, 100 aýrýhana” baǵdarlamalarynyń oryndalý barysyna partııalyq baqylaý ornatý maqsatymen árbir salynyp jatqan, kúrdeli jóndeý júrgizilip jatqan nysanǵa partııalyq baqylaý beketterin qurdyq. Qazirdiń ózinde oblysymyzda bizdiń 86 baqylaý beketimiz jumys jasap tur. Olardyń jumystaryn úılestirý maqsatymen árbir beketke depýtattarymyzdy, bastaýysh partııa uıymdarynyń tóraǵalaryn jaýapty etip bekittik. Salynyp jatqan nysan­darǵa partııalyq baqylaý komıssııasynyń múshe­lerimen reıdter ótkizýimiz, bul kezde anyqtalǵan olqylyqtardy túzetý baǵytyndaǵy jumysta­rymyz nátıjesiz emes. Máselen, shilde aıynda Túpqaraǵan, Munaı­ly aýdandaryna jáne Aqtaý qalasyndaǵy bir­qa­tar áleýmettik nysandarǵa júrgizgen reıdterimiz kezinde kóptegen olqylyqtardyń beti ashylyp, komıssııa talqysyna salyndy. Nátıjesinde mektepterdiń oqý jylynyń bastalýyna deıin daıyn bolýyna yqpal ettik, densaýlyq saqtaý nysandaryndaǵy kemshilikter jedeǵabyl tú­zetildi. “Jol kartasy” baǵdarlamasy boıynsha salynyp, jóndelip jatqan áleýmettik ny­sandarǵa bıyl 4 mlrd. 425,4 mln. teńge bólingen bolatyn. Bizdiń partııalyq baqylaý beketterimiz negizinen úsh baǵytta – turǵyn úı-kommýnaldyq sharýashylyq nysan­da­ryn­da, bilim berý, den­saýlyq saqtaý salalary­nyń nysandarynda jáne aýyldardaǵy mádenı-áleýmettik nysandarynda jumys isteıdi. Partııalyq baqylaý beketteri biryń­ǵaı úlgidegi bannerlermen jabdyqtaldy. Retti jerinde aıta ke­teıin, jergilikti depýtat­tarymyzben jumys júrgizýde osal tustarymyz bar ekeni shilde aıynda ótken saıası keńestiń bıýro májilisinde naqty aıtyldy. Májiliste partııadan usynylyp, halyq qalaýlylary atanǵan árbir depýtat ózderi saılanǵan okrýg­ter­degi sheshimin kútken máselelerdi sheshýge ákim­dermen, partııa fılıaldarymen birlikte jumy­lýǵa mindetti. О́ńirdiń ózekti degen máselelerin sessııalardyń qaraýyna engizip, qajet degen salaǵa qarajat bólgizý, birqatar máselelerdiń sheshilýine ınvestor-kásiporyndardy jumyldyrý sııaqty san alýan jumystyń bel ortasynan depýtattardy kórgimiz keledi. Oblystyq, aýmaq­tyq fılıaldardyń saıası keńesterinde depý­tattardyń esebin tyńdaý, qoldanystaǵy zań­dardyń osal tustaryn jetildirý baǵytynda, jergilikti jerlerdegi tájirıbege súıene otyryp, Parlamenttegi partııa fraksııasyna usynystar túsirý, birqatar kúrdeli máseleler jóninde depýtattyq saýaldar boıynsha jurtshylyqtyń qoǵamdyq tyńdaýlaryn ótkizý, osy kezde jınaqtalǵan qundy usynystardy tıisti atqarýshy organdarǵa jetkizý – kezek kúttirmeı qolǵa alatyn jumystarymyz. Partııalyq baqylaý komıtetiniń oblystaǵy ınspeksııasy sybaılas jemqorlyqpen kúres jónindegi keńes múshelerimen, oblystyq qarjy baqylaý komıtetimen birlikte tamyz aıynda 5 baqylaý-tekserý reıdterin júrgizdi. Reıdterdiń nátıjesinde áleýmettik nysandarda jumys jasap jatqan merdiger kásiporyndar tarapynan jiberilgen qarjy zańdylyqtaryn buzý faktileri, naqtyraq aıtsam, jalpy somasy 441 555,8 myń teńgeniń ysyrapqa túskeni anyqtalyp, prokýratýra organdaryna jiberildi. Osyndaı tegeýrindi sharalar memleket qarajatyn talan-tarajǵa salýshylarmen kúres sharalaryna tyń serpin berýmen qatar, áleýmettik nysandardyń ýaqytynda sapaly jóndelip, el ıgiligine aınalýyna, túptep kelgende, jurtshylyqtyń partııaǵa degen senimin odan ári nyǵaıta túsýine jol ashqanyn aıtý kerek. – Endi nurotandyqtar qatarynyń sapalyq quramy jáne múshelikke jańadan qabyldaný­shylar jaıly qysqasha aıta ketseńiz. – Partııanyń el ishindegi bedeli men áleýetiniń artýy partııa músheleriniń sapalyq quramyna tikeleı baılanysty ekeni anyq. Sońǵy jyldary partııa qataryna qabyldanýshylardy aldyn-ala saraptan ótkizip, ujym aldyndaǵy bedeli men belsendiligine aıryqsha nazar aýdara bastadyq. Bul oraıda bastaýysh partııa uıym­daryna kóbirek salmaq salyp, olardyń halyq aldyndaǵy bedelin kóterýdi, sol arqyly partııa qataryn ıdeıalyq jaǵynan nyǵaıtýdy basty mindet etip qoıdyq. Bizderdi oblys kóleminde partııa qataryna qabyldanýǵa tilek bildirýshiler sany aı sanap artyp kele jatqany qýantady. Bir ǵana shilde-tamyz aılarynda partııa qataryna 319 adam qabyldandy, “Qazaqtelekom” aksıonerlik qoǵamynda bastaýysh partııa uıymy qurylyp, 27 baılanysshy partııa qataryna qabyldandy. MAEK “Qazatomónerkásip” JShS-inde ótken saltanatty jınalysta kásiporynnyń 50 ju­mysshysy ózderin kóshbasshy partııa qatarynda kórgisi keletindikterin bildirdi. Oraıy kelgende aıta keteıin, ústimizdegi jyl­dyń shilde aıynda partııanyń Ortalyq appa­ratyna partııanyń Mańǵystaý oblystyq fı­lıalynyń 2010 jyldyń birinshi jartysyna júrgizgen jumystarynyń esebi tapsyryldy. Ortalyq apparat bizdiń fılıaldyń jumysyna oń baǵa berdi. О́tken segiz aı ishinde partııa oblystyq fı­lıalynyń uıymdastyrýymen 526 shara ótkizilip, olarǵa 220 myńǵa jýyq adam qamtyldy. Bul sharalardyń ishinde “Ardagerlerdi ardaqtaıyq”, “Nar tulǵa”, “Otandastar”, “Kıeli muralary­myzǵa taǵzym”, “Aýyldyń gúldenýi – Qazaqstan­nyń gúldenýi”, “Dıplommen – aýylǵa!” sııaqty aksııalar aıasynda ótkizilip kele jatqan sha­ra­larymyz buqaralyq sıpat alyp, jurtshylyqtyń yntasyn týǵyzdy. Bul aksııalar aldaǵy ýaqytta da jalǵasa beretin bolady. – Áńgimeńiz úshin rahmet. Áńgimelesken Jolaman BOShALAQ. Mańǵystaý oblysy.