Qyzylorda qalasynda irge kóterdi
[caption id="attachment_41861" align="alignnone" width="560"] Sýret:twitter.com[/caption]
Qyzylordada sońǵy jyldary mádenıet salasy qarqyndy damyp keledi. Sonyń bir aıǵaǵy, qalalyq mádenıet jáne tilderdi damytý bóliminiń uıymdastyrýymen qurylǵan jastar teatry bolsa kerek.
– Bólim janynan ashylyp otyrǵan jastar teatryna bıýdjetten arnaıy qarjy qaralmaǵan. Mundaǵy artıster – mádenıet úılerindegi túrli úıirmelerde óner kórsetip júrgen jastar. Teatrdyń bastamasy jaman emes, – deıdi qalalyq mádenıet bóliminiń basshysy Ǵalym Baımyrzaev.
Teatrda arnaıy artıstik mamandyqtary bolmasa da, dramatýrgııany júregimen túsinetin jastar óner kórsetedi. Taıaýda ǵana shymyldyǵyn túrgen teatrdyń ónerli órenderi á degennen «Alǵashqy mahabbat» pesasyn sahnalap, ónersúıer qaýym jastardyń tyrnaqaldy qoıylymyna oń baǵasyn berdi. Jalpy, qoıylymda artıster qazirgi qoǵam keleńsizdikterin satıralyq janrda ádemi beınelep jetkizgen. Onda arman qýǵan jastardyń aldynan kóldeneń tartylatyn kedergiler, mektep oqýshysynyń alǵashqy jáne baıansyz mahabbaty sýretteledi. Jas áýesqoı sahnagerler obrazdardy sheber somdap, mahabbat mashaqaty máselesin tereńnen qozǵaıdy.
– Teatrdyń alda jospary kóp. Mysaly, Oljas Súleımenov shyǵarmashylyǵynan tyń dúnıeler alyp kórsetkimiz keledi. Birjan saldyń ómir joly týraly qoıylymdy kópshilikke usyný josparymyzda bar, – deıdi jastar teatrynyń rejısseri Ońtalap Nurmahanov.
Aıta keteıik, jastar teatry aldaǵy ýaqytta mazmundy qoıylymdar qataryn kóbeıtip, tyń týyndylardy ómirge ákelmekshi.
Talǵat RAIYMBEK,
«Egemen Qazaqstan»