Bıylǵy kóktemgi jaýyn-shashynnyń shamadan tys kóp bolýy áser etti me eken, Jambyl oblysynda salmaǵy 17 kıloǵa jýyq sańyraýqulaq tabyldy. «Naızaǵaı oınap, kún qatty kúrkiregen saıyn qozyquıryq qaptap shyǵady» degen halyqtyń nanymyna senetin bolsaq, bıylǵy kóktemniń aspany tabıǵattyń jarqyly men dúrsiline toly bolǵany da belgili. Áıteýir, alyp sańyraýqulaq tabıǵat aıasynda qozyquıryq terýge shyqqandardyń nazaryna birden iligipti. Ony taýyp alǵan Jambyl oblysynan saılanǵan eks-senator Aleksandr Savchenko sańyraýqulaqtyń aýyr salmaǵyna ózi de qatty tańǵalyp otyr.
Negizi, mundaı erekshe sańyraýqulaqtardy Jambyl oblysy aýmaǵynyń jartysyna jýyǵyn alyp jatqan Moıynqum aýdanynda kezdestirýge bolady. Mamandar bul qozyquıryqty tutynbastan buryn SES zerthanasynda radıasııa men toksınderden tekserip alýdy usyndy. «Ulttyq saraptaý ortalyǵynyń» meńgerýshisi Vıoletta Kasapaklıs ony tekserip, tutynýǵa jaramdy ekenin aıtty.
Oralhan DÁÝIT,
«Egemen Qazaqstan»
Jambyl oblysy