QARAǴANDY. 26 mamyr. Qaraǵandydaǵy Nazarbaev zııatkerlik mektebiniń túlegi Aıjan Ahmetjanova Princeton University (Prınston, AQSh) tolyq grantyna ıe bolyp, shaqyrtý aldy. Bul týraly oblystyq bilim berý basqarmasynyń baspasóz qyzmetine silteme jasaǵan egemen.kz tilshisi habarlady.
«Aıjan Ahmetjanova mynadaı halyqaralyq emtıhandardy tapsyrdy: SAT Reasoning – 2140/2400, Physics, Maths, Chemistry – 800/800. TOEFL PBT -657/677, IELTS 8.5/9.0», – delingen habarlamada.
Nazarbaev zııatkerlik mektebin hımııa-bıologııa baǵyty boıynsha bitirgen túlek AQSh-ta oqý óziniń bala kúnnen kele jatqan armany ekenin aıtady. Ýnıversıtette «Qala qurylysy ınjenerııasy» mamandyǵy boıynsha oqıtyn Aıjan bolashaqta doktorlyq dárejege qol jetkizýdi aldyna maqsat etip qoıǵan.
Aıta keteıik, Prınston ýnıversıteti álemde Plıýsha lıgasyna enetin segiz oqý ornynyń biri.
Qaırat Ábildınov.
Derek, foto: Qaraǵandy oblystyq bilim berý basqarmasynyń baspasóz qyzmeti.