ASTANA. 26 mamyr. Qazaqstan Prezıdenti Nursultan Nazarbaev Halyqaralyq konsýltatıvtik keńes múshelerimen kezdesti. Bul týraly akorda.kz-ke silteme jasaǵan egemen.kz tilshisi habarlady.
Kezdesýge keńes tóraǵasy, Avstrııanyń burynǵy federaldyq kansleri A.Gýzenbaýer, Polshanyń burynǵy prezıdenti A.Kvasnevskıı, Eýropalyq komıssııanyń burynǵy tóraǵasy, Italııanyń burynǵy premer-mınıstri R.Prodı, Izraıldiń burynǵy premer-mınıstri E.Barak qatysty.
Kezdesýge qatysýshylar Qazaqstan ekonomıkasynyń negizgi damý baǵytyn, memlekettik baǵdarlamalardyń júzege asyrylý barysyn, sondaı-aq, Eýroodaq elderimen yntymaqtastyqty nyǵaıtý úshin qabyldanyp jatqan sharalardy, Dúnıejúzilik saýda uıymyna músheliktiń artyqshylyqtaryn paıdalaný máselelerin talqylady.
Qazaqstan Prezıdenti álemdik ekonomıkadaǵy qubylmalylyqqa, onyń bizdiń elge de áser etip otyrǵanyna nazar aýdardy.
«Jahandyq ekonomıka ósimi boljanǵan kórsetkishterden tómen bolyp shyqty. Buǵan qosa, álem qandaı baǵytta jyljyp bara jatqany, ony qysqa jáne uzaq merzimdi kezeńde ne kútip turǵany týraly kóńilge qonymdy sarapshylyq pikir joq. Qazir Eýropada, Reseı men Qytaıda kúrdeli úderister júrip jatyr. Osynyń bári bolashaq jahandyq damý turǵysynan zor qyzyǵýshylyq týdyrady. Sonymen qatar, bizdiń el atalǵan qıyndyqtarǵa qaramastan budan ári ilgerileýdi qamtamasyz ete otyryp, óz reformalaryn júzege asyrýyn jalǵastyrýda», – dedi Memleket basshysy.
Keńes músheleri kezdesý úshin alǵys aıtyp, jahandyq kún tártibinde turǵan ózekti saıası jáne ekonomıkalyq máselelerge qatysty pikirlerin ortaǵa saldy.
Atap aıtqanda, Avstrııanyń burynǵy federaldyq kansleri A.Gýzenbaýer Qazaqstan júzege asyryp jatqan reformalar jańa jahandyq syn-qaterlerge ýaqytyly berilgen jaýap ekenin jáne olar bizdiń respýblıkamyzǵa meılinshe damyǵan elder klýbynan oryn alýǵa múmkindik beretinin atap ótti.
Izraıldiń burynǵy premer-mınıstri E.Barak otandyq agroónerkásip keshenin damytý máselelerine toqtaldy. Ol Qazaqstannyń álemdik azyq-túlik naryǵynda básekege qabiletti oryndy ıelenýi úshin qajetti barlyq resýrsqa ıe ekenin málimdedi.
Polshanyń burynǵy prezıdenti A.Kvasnevskıı áleýmettik máselelerdi sheshýge, adam kapıtalyn jetildirýge, shaǵyn jáne orta kásiporyndardy qoldaýǵa baǵyttalǵan reformalardyń arqasynda eldiń júıeli damyp kele jatqanyn atap ótti.
Eýropalyq komıssııanyń burynǵy tóraǵasy ári Italııanyń burynǵy premer-mınıstri R.Prodı Eýrazııalyq ekonomıkalyq odaq pen Eýropalyq odaqtyń arasyndaǵy qarym-qatynastyń damý áleýeti zor ekenine, ol barlyq tarapqa, sonyń ishinde Qazaqstanǵa paıda ákele alatynyna nazar aýdardy.
Talǵat Raıymbek.
Derek, foto: akorda.kz.