KО́KShETAÝ. 26 mamyr. Aqmola oblysynyń ortalyǵynda Jer reformasy jónindegi qoǵamdyq keńestiń keńeıtilgen otyrysy boldy. Bul týraly oblystyq ákimdik baspasóz qyzmetiniń deregine súıengen egemen.kz tilshisi habarlady.
Otyrysqa oblys qalalary men aýdandaryndaǵy qoǵamdyq keńesterdiń tóraǵalary, saıası partııalardyń, qoǵamdyq jáne etnomádenı birlestikterdiń ókilderi, sharýa qojalyqtarynyń jetekshileri, aýdandar ákimderiniń aýyl sharýashylyǵy jónindegi orynbasarlary, Kókshetaý qalasynyń qurmetti azamattary jáne buqaralyq aqparat quraldarynyń ókilderi, barlyǵy 120 adam qatysty.
Oblystyq qoǵamdyq keńestiń tóraǵasy Dýlat Nurmoldın atalmysh sharanyń qoǵamdastyqtar ókilderiniń pikirlerin tyńdaýǵa, kelip túsken pikirler men usynystardy saralaýǵa sondaı-aq olardy Jer reformasy týraly respýblıkalyq komıssııaǵa joldaýǵa arnalǵan dıalog alańy bolýǵa tıis ekenin atap ótti.
Oblystyq jer qatynastary basqarmasynyń basshysy Almagúl Qadyralına Jer týraly zańnamaǵa engizilgeli turǵan qazirgi ózgerister men tolyqtyrýlar týraly habarlama jasady.
Jıynda sondaı-aq oblystyq máslıhattyń depýtaty, Jer reformasy týraly respýblıkalyq keńestiń múshesi Nartaı Ysqaqov komıssııaǵa qandaı usynystardyń túskeni jóninde keńinen áńgimelep berdi. Kórshi memlekettermen shektesetin aýmaqtardaǵy jerlerdi jalǵa berýge bolmaıtyny týraly oıdy «Aq jol» demokratııalyq partııasyn oblystyq fılıalynyń tóraǵasy Serik Beısembaev jetkizdi. Otyrysta budan basqa «Qazaq tili men mádenıeti» oblystyq qoǵamdyq birlestiginiń tóraǵasy Meırambek Kıikov, Kókshetaý qalasynyń qurmetti azamaty, Densaýlyq isiniń úzdigi Bolat Janádilov, ekonomıka professory Qasymhan Qusaıynov, oblystyq qoǵamdyq keńestiń múshesi Bolat Jupynov jáne basqalar óz oılaryn ortaǵa saldy.
Qorytyndyda Dýlat Nurmoldın kezdesýde aıtylǵan máseleler men usynystardyń bári eskerýsiz qalmaıtynyn, olardyń respýblıkalyq komıssııaǵa joldanatynyn aıtty.
Baqbergen Amalbek.
Derek: Aqmola oblystyq ákimdiginiń baspasóz qyzmeti.