Almaty oblysyna qarasty Qarasaı aýdandyq ishki ister bóliminiń qyzmetkerleri jumbaq jaǵdaıda joǵalyp ketken medbıkeni izdestirip jatyr.
7sunews.kz telearnasynyń habarlaýynsha, aýdandyq aýrýhanada medbıke bolyp jumys jasaıtyn áıel korporatıvti keshten keıin úıine qaıtyp oralmaǵan.
«Sodan beri arada bir apta ýaqyt ótti. Áriptesteri jaǵdaıdy túsindirgileri kelmeıdi. Al joǵalǵan áıeldi tek balalary ǵana izdep júr», - dep habarlady «31 arna».
Baqytjan Esenálıev bir aptadan beri anasyn izdep júrgen kórinedi. Ol sodan beri Qaskeleń ózeni arnasyn túgel ssúzip shyqqaan. Jurt sońǵy ret Gúlnar Esenálıevany osy jerden kóripti. Ol 18 maýsym kúni korporatıvke ketkennen qaıtyp úıine oralmaǵan.
«Keshe onyń bir týflıin taýyp aldyq. Biraq denesi tabylar emes. Úıdegi kishkentaı inim shyn máninde ne bolǵanyn bilmeıdi. Biz oǵan mamamnyń bir jaqqa ketip qalǵanyn aıttyq ta qoıdyq. Biraq ol bárin sezedi dep oılaımyn», - deıdi joǵalǵan áıeldiń úlken uly Baqytjan.
Týǵan-týystary Gúlnar sýǵa qulap ketken bolýy múmkin degendi aıtady.
Myna sýret medbıke joǵalyp ketetin kúni túsirilipti. Qarasaı aýdandyq aýrýhanasynyń qyzmetshisin áriptesteri sýretke basyp alypty. Alaıda, solardyń birde-biri qazir sol kúni ne bolǵanyn aıtqylary kelmeı otyrǵanǵa uqsaıdy. Qazir áıeldi izdestirýmen polıseıler jáne eriktiler aınalysa bastapty. Negizgi boljam Gúlnar sýǵa batyp ketýi múmkin degenge saıady.
«Biz qazir barlyq boljamdar boıynsha jumys jasap jatyrmyz. Joǵalǵan áıeldi izdestirýge shyn máninde bólimshe men tótenshe jaǵdaılardyń barlyq qyzmetkerlerin qostyq. Jaqyn arada nátıjesi belgili bolyp qalady dep oılaımyn», - dedi oblystyq ishki ister departamentindegiler.
Gúlnar Esenálıeva bir ózi eki bala tárbıelep otyrǵan. Onyń úlken uly Baqytjan qazir 22-de, al kishisi 11-de. Balalarǵa ázir týystary qarasyp jatyr.
Nurbol ÁLDIBAEV.