Qazaqstan Respýblıkasynyń Tótenshe jáne ókiletti elshisi Qaırat Sarjanov Brazılııa Federatıvtik Respýblıkasy prezıdentiniń mindetin atqarýshy Mıshel Temerge Senim gramotasyn tapsyrdy.
Kezdesý barysynda suhbattastar ekijaqty qarym-qatynastardy damytýdyń perspektıvalaryn talqylady. Q.Sarjanov elimizdiń Brazılııamen mashına jasaý, metall óńdeý, munaı jáne munaı hımııasy ónerkásibi salalarynda yntymaqtastyqty nyǵaıtýǵa, sondaı-aq, brazılııalyq ınvestısııalar men jańa tehnologııalardy tartýǵa múddeli ekenin jetkizdi.
Elshi ekijaqty saýda aınalymynyń qurylymyn eskere otyryp, aýyl sharýashylyǵy salasynda yntymaqtastyqty damytý múmkindigi mol ekenin atap ótti, onyń ishinde Qazaqstan aýmaǵynda et, sút shyǵaratyn birlesken kásiporyndar qurý, sondaı-aq, aýyl sharýashylyǵy ónimderin zamanaýı tehnologııalardy qoldaný arqyly óńdeý boıynsha tájirıbe almasý sııaqty máselelerge nazar aýdaryldy. Sonymen birge, ol elimizdiń áýe baılanysy quramynda Brazılııanyń «Embraer» kompanııasynyń 12 jolaýshy ushaǵynyń bar ekenine baılanysty Qazaqstanda avıasııalyq-tehnıkalyq ortalyq ashý múmkindigin qarastyrýdy usyndy.
Elshi Astanada EKSPO-2017 halyqaralyq mamandandyrylǵan kórmesin ótkizýge daıyndyq jumystary belsendi júrgizilip jatqanyna erekshe nazar aýdaryp, Brazılııanyń qatysýy týraly resmı rastaý qujatyn jiberý máselesin jáne «EKSPO» Komıssaryn taǵaıyndaý rásimin tezdetýge shaqyrdy. Brazılııanyń «Itaıpý Bınasıonal» kompanııasy EKSPO-2017 alańynda ulttyq pavılon ashý máselesinde Brazılııa úkimetine qarjylyq kómek kórsetýge daıyn otyr eken.
Q.Sarjanov Qazaqstanda «Nurly Jol» baǵdarlamasy men Bes ınstıtýttyq reformany júzege asyrýǵa baǵyttalǵan «100 naqty qadam» Ult Jospary negizinde qoǵamdy damytý men ekonomıkany ártaraptandyrý boıynsha atqarylyp jatqan jumystar, ınvestısııalyq klımatty jetildirý baǵytyndaǵy is-sharalar, jekeshelendirý úderisteri týraly habarlady. Sondaı-aq, elshi Qazaqstan Prezıdentiniń bitimgerlik bastamasy – «Álem. XXI ǵasyr» manıfesiniń negizgi qyrlary týraly baıandady.
О́z kezeginde M.Temer Qazaqstan Prezıdenti Nursultan Nazarbaevqa Qazaqstan halqynyń ıgiligi úshin jasap kele jatqan jumysynda tabys tiledi. Dúnıejúziniń saıasat sahnasynda Qazaqstannyń bedeli óse túsip otyrǵanyn atap ótip, Brazılııanyń elimizben barlyq salada ózara yqpaldasýǵa daıyn ekendigin bildirdi jáne eki jaqtyń saýda-ekonomıkalyq áleýetin belsendi ete túsýge barlyq múmkinshilikter bar ekenin málimdedi.
«Egemen-aqparat»