Jasampaz eldiń jarqyn jeńisi

Keshe Astanada olımpıadashylardyń qurmetine arnalǵan saltanatty shara ótti.  Rásimge Elbasy Nursultan Nazarbaev qatysyp, Olımpıada chempıondary men júldegerlerin marapattady Saltanatty shara aldymen Esil óze­niniń sol jaǵalaýynda oryn tepken jańa ákimshilik ortalyqta bastaý al­dy. Mun­da Olımpıadanyń chempıon­dary men júldegerleri «Báıterek» moný­men­ti alańynda xalyqpen kezdesip, kóp­­shi­liktiń qoshemetine bólendi. Osy jer­de jurt­shylyq ózderiniń súıikti sportshylarymen birge fotosýretke túsip, emen-jarqyn áńgimelesti. Odan keıin Olımpıada chempıondary men júldegerleri mingen kortej júz­deri bal-bul janǵan jankúıerlerdiń qo­she­metimen «Qazaqstan» ortalyq konsert zalyna deıin sherý tartyp ótti. Al Ortalyq konsert zalyna kelgende olardy astanalyqtar men qala qonaq­tary taǵy da zor qoshemetpen qarsy aldy. Saltanatty sharada jurtshylyq Elba­sy Nursultan Nazarbaev pen olım­pıa­da­shylarǵa «Alǵa, Qazaqstan! Jasa, Qazaqstan!» degen uranmen oryndarynan turyp qurmet kórsetti. Osy jerde Mem­leket basshysy barsha qazaq­stan­dyq­tardy ulttyq quramanyń Rıo-de-Janeı­rodaǵy HHHI jazǵy Olımpııa oıyn­darynda tabysty óner kórsetýimen quttyq­tady. – Bizdiń sportshylarymyzdyń Olım­pıa­dadaǵy medaldary, joǵary sporttyq nátıjeleri men jetistikteri Qazaqstan táýelsizdiginiń aldaǵy 25 jyldyǵyna laıyqty syı bolyp sanalady. Sizder biz­diń elimizdiń halyqaralyq sporttaǵy már­tebesi bıik ekenin dáleldep, jattyqtyrýshylar men jankúıerlerdiń ǵana emes, barsha qazaqstandyqtardyń úmitin aqtadyńyzdar, – dedi Nursultan Nazarbaev. Qazaqstan Prezıdenti osy Olım­pıadada bizdiń qurama túrli dárejedegi 17 medaldy ıelengenin atap ótti. – Bul – Qazaqstannyń álemdik olım­pıadalyq qozǵalysqa qatysý tarıh­yn­daǵy basqa Olımpııa oıyndarynda alǵan júldelerden áldeqaıda kóp. Res­mı emes medal sany boıynsha bizdiń olım­pıa­dalyq qurama álemniń 207 eliniń sporttyq quramalary ishinde 22-orynda tur. Barshamyz Rıodaǵy Olım­pıada tuǵyr­larynda elimizdiń ánurany 3 ret shyr­qalyp, týymyzdyń 3 ret eń bıikte jel­biregenine maqtanamyz. Osy­laı­sha, boksshy Danııar Eleýsinov, sýǵa jú­zýden el tarıhyndaǵy tuńǵysh chempıon Dmıtrıı Balandın, aýyr atlet Nıdjat Rahımov erekshe jetistikterge je­tip, Olımpıada jeńimpazy atandy. Olımpıadadaǵy tabystyń ortaq qorjy­nyna 5 kúmis jáne 9 qola medal ıeger­leri olja saldy, – dedi Memleket basshysy. Odan ári Elbasy Olımpıadada kúmis jáne qola medal jeńip alǵan sportshylardy quttyqtaıtynyn aıtty. Onda Nur­sultan Ábishuly kúmis júldegerler Ádil­bek Nııazymbetov pen Vasılıı Levıt­ke altyn medaldyń syıaqysy tapsy­ry­latynyn, óıtkeni, olardyń jahan­dyq jarysta kórsetken ónerine tek Qa­zaqstan halqy emes, barsha álem jan­kúıerleri rıza bolǵanyn jetkizdi. – Biz eki boksshymyzdyń medaldaryn Olımpıadanyń altyn júldesi dep sanaýymyz kerek. Osyǵan baılanysty olardyń júldesin yntalandyrý turǵysynan altyn medalmen teńestirdim, – dedi Prezıdent. Sol sııaqty ol jeńil atlet Olga Rypakovanyń qola medalin altyn júlde retinde baǵalaıtynyn atap ótti. Jaqynda sportshy Shveısarııanyń Lozanna qalasynda ótip jatqan 11-shi «Gaýhar lıgasynda» kúmis júldeger atan­ǵan bolatyn. Bul synda ol úsh qarǵyp sekirý boıynsha 14,53 metrge sekir­di. Elbasy jeńil atlettiń osy jetis­tigin de eskerip, Rypakovanyń elimiz spor­tynyń damýyna ólsheýsiz úles qosyp kele jatqanyn aıtty. – Jeńil atletıkada Olga Rypakova bıik shyńnan túsip kórgen joq. Olım­pıadada júlde jeńip alý ońaı emes. Bul dodaǵa myńnan tulpar, júzden júırik sportshylar ǵana qatysady. Báriniń armany – Olımpıada medali. Olar sol úshin jan alysyp, jan berisip jarysady. Olganyń qola medali de altyn júldege tatıdy. Sebebi, ol London jáne Rıo Olımpıadalary arasynda ómirge ul ákelip úlgerdi. Qazir balasy úshke toldy. Olga – birinshiden ana, ekinshiden naǵyz batyr áıel. Eki úlken dodanyń arasynda jarystarǵa qatysyp, bıik belesterden kórinip júrdi. Bul sportshynyń óz kásibine adaldyǵyn, óz eline degen adal qyzmetin, qurmetin kórsetedi, – dedi. Sonymen qatar, Memleket basshysy qola júlde alǵan sportshylarǵa bola­shaqta bıik tuǵyrlardan kórinýlerine tilektestigin bildirdi. Sondaı-aq, Nursultan Nazarbaev ult­tyq quramanyń jattyqtyrýshylar quramyna, olımpıadashylardyń otbasylaryna jáne barsha qazaqstandyqtarǵa qoldaý bildirgeni úshin, al sportshylarǵa naǵyz básekede kórsetken erik-jigeri men olımpıadalyq dańqqa umtylysy úshin alǵys aıtty. Qazaqstan Prezıdenti ulttyq qura­manyń jetistikteri Rıo-de-Janeıroda ótetin aldaǵy HV jazǵy Paralımpııalyq oıyndarǵa qatysatyn sportshylarǵa rýh beretinin aıtyp, olarǵa tabys pen joǵary nátıje tiledi. Bıylǵy Paralımpıadaǵa Qazaq­stannan 10 sportshy qatysady. Olardyń arasynda júzýden Roman Agalakov, Natalıa Zvıagınseva, Ánýar Ahmetov pen Zúlfııa Ǵabıdýllına, dzıýdodan Ánýar Sarıev bar. Paýerlıfterler Gúlbaný Ábdixalyqova, Raýshan Qoıshybaeva, Vadım Dýkart ta Paralımpıada medali úshin kúsh synasady. Jeńil atletıkada el namysyn Aman Qalqaev, sadaq atýdan Aleksandr Medvedev qorǵaıdy. Memleket basshysy Qazaqstan qura­­masynyń Olımpıadada kórset­ken jetistikteri sportshy-paralım­pıa­da­shyl­arymyzǵa shabyt beretinin, endi bir­neshe kúnnen keıin olar Rıo-de-Ja­neıroda jarysty bastaıtynyn aıtty. – Paralımpııalyq oıyndar – jaýapty syn. Osy synda sátti óner kórsetýdi já­ne joǵary nátıjelermen oralýdy tileıik, – dedi Prezıdent. Elbasy Álemdik olımpıadalyq qoz­ǵa­lysqa qatysqan atletterimiz Qazaq­stan­nyń 25 jyldyq belesinde kóptegen jar­qyn jeńisterge qol jetkizgenin aıtty. – Qazaqstandyqtardyń 2016 jylǵy je­ńip alǵan marapattaryn qosqanda elimizdiń olımpıadalyq qazynasyndaǵy medal sany 69-ǵa jetti. Bizdiń elimizde 1992 jyldan bergi Jazǵy jáne Qysqy Olımpııalyq oıyndarynda jeńimpaz bolǵan 19 Olımpıada chempıony, 22 kúmis jáne 28 qola medal ıegeri bar. Bul joǵary jetistikter – memlekettiń turaq­ty qamqorlyǵynyń jáne sportty damy­týǵa jaǵdaı jasaýdyń nátıjesi, – dedi Nursultan Nazarbaev. Osydan keıin Elbasy Olımpıada chem­pıondaryn II dárejeli «Barys» orde­nimen marapattady. Elbasy qolynan joǵary nagradany Olımpıada chempıondary Danııar Eleý­sinov, Dmıtrıı Balandın men Nıdjat Raxımov aldy. Sonymen birge ol osy ordendi bokstan Olımpıadanyń kú­mis júldegerleri Vasılıı Levıt pen Ádilbek Nııazymbetovke de tapsyrdy. Osy kezde saltanatty sharaǵa jınal­ǵan halyq Memleket basshysynyń sheshi­mine rızashylyqtaryn bildirip, olımpıa­dashylarǵa oryndarynan turyp qurmet kórsetti. «Barys» ordeni Qazaqstan Res­pýb­lıkasynyń mem­lekettigi men egemendigin nyǵaıtý icine, beıbitshilikti, qoǵamnyń toptasýy men Qazaqstan halqynyń bir­ligin qamtamasyz etýge, memlekettik, óndiristik, ǵylymı, áleýmettik-mádenı jáne qoǵamdyq qyz­mette, halyqtar ara­syndaǵy ynty­maq­tastyqty nyǵaıtýǵa, ulttyq mádenıet­terdi jaqyndastyrý men ózara baıytýǵa, memleketter arasyndaǵy dostyq qaty­nastardy damytýǵa cińipgen erekshe eńbegi úshin beriledi. 1999 jyly Qazaqstan Respýblıkasy Prezıdentiniń Jarlyǵymen «Barys» ordeni úsh dárejeli bolyp bekitildi. Kezdesýde N.Nazarbaev kúmis júlde­ger­ler Jazıra Japparqul (aýyr atletıka), Eldos Smetov (dzıýdo), Gúzel Manıýrova (qyzdar kúresi) men bokstan qola júldeni ıelengen Ivan Dychkoǵa «Parasat» ordenin tabys etti. Al «Qur­met» ordenimen qola júldegerler – dzıý­­doshy Galbadrax Otgonseseg, zilte­mir­shiler Karına Gorıcheva, Alek­sandr Zaı­chıkov pen Farxat Harkı, erkin kúres sheberleri Ekaterına Larıonova men El­mıra Syzdyqova jáne boksshy Da­rıǵa Shákimova marapattaldy. Saltanatty sharada Olımpıada chem­pıon­­dary men júldegerleri sóz alyp, eli­mizde sportty damytý baǵy­tyn­da júrgizilip jatqan saıasatqa, jan­kúıer­lerdiń qoldaýyna rızashylyǵyn bildirdi. Aldymen Danııar Eleýsinov sóz sóı­ledi. – Asa mártebeli Elbasy! Biz Rıoǵa at­tanarda «Jeńispen oralyńdar» dep tap­syrma bergen edińiz. Sol tapsyr­mań­yz oryndaldy. Sol senimdi, úmitti aq­tap shyqqanyma maqtanamyn. Men táýel­sizdiktiń tól qurdasymyn. Jasym 25-te. Osy táýelsizdik jyldarynda eli­miz­diń jetken jetistikterin aıtyp jetki­zý múmkin emes. Biz, Táýelsizdiktiń perzent­teri, árqashan sizdiń senimińizden shyǵýǵa ty­rysamyz. Men bilemin, kóbińiz tún uıqy­laryńyzdy tórt bólip, Rıo-de-Janeı­roda júrgen bizderge jankúıer boldyń­yzdar. Osy qoldaýlaryńyzǵa alǵys aıtamyz, ardaq tutamyz. Barlyq­taryńyzǵa raxmet! – dedi. Al elimizde tuńǵysh ret sý sportynan Olımpıadanyń altyn medalin jeńip alǵan Dmıtrıı Balandın de Memleket basshysynyń sportty damytyp, jarys jolynda júrgen otandastarymyz­dy qoldap-qolpashtap jatqanyna myń da bir alǵys aıtty. Odan keıin ol jan­kúıerlerge alǵysyn bildirdi. – Qolpashtap, demep júrgen sizderge rızamyz! Biz Olımpıadada sonyń bárin sezinip júrdik. Sizderdiń qoldaýlaryńyz bolmasa, biz Olımp shyńyn baǵyndyra almas ta edik. Sol úshin úlken raxmet! – dep sózin aıaqtady ol. Kelesi bolyp sóz alǵan aýyr atlet Nıd­­jat Rahımov, Jazıra Japparqul men kúres sheberi Gúzel Manıýrova da mem­leketke, jankúıerlerge alǵysyn jetkizdi. – Asa qurmetti Elbasy, – dep bastady sózin Jazıra. – Aqordada bergen aq batańyzben Olımpıadadan júldeli oralyp otyrmyn. Sizge el aldynda júlde ala­myn dep sert bergen edim. Sol senim­di aqtap shyqtym. Bul júldege jan­kúı­er­lerdiń qoldaýynyń arqasynda jet­tim. Jankúıerlerge alǵysymyz sheksiz. Al Gúzel Manıýrova bolsa tolqyp, te­birenip sóz sóıledi. Ol elimizge El­ba­synyń qoldaýynyń arqasynda Olım­pııalyq oıyndarǵa taǵy bir márte qatysýǵa jáne elimizge medal alyp berýge múmkindik alǵanyn aıtty. – Bul – umytylmas sát. Men ózim­niń Prezıdentime, elime degen maqtany­shym­dy áli de bolsa jasyra almaı júrmin. Biz Qazaqstannyń álemdegi sporttyq derjava ekenin taǵy bir márte dáleldedik dep sanaımyn, – dedi óz oıyn aıtqan kúmis júldeger. Sharanyń sońynda Prezıdent ­N.Na­zar­baev barsha qazaqstandyqtardy Olım­­­pıa­dadaǵy jeńispen quttyqtap, álemdik sport bıiginde jańa tabystarǵa jetýge ti­lek­testigin bildirdi. Osy kezde zalda bir kishkentaı balanyń jylaǵan daý­y­sy es­­tilgen edi. Sony baıqaǵan Elba­sy zal­ǵa qarata: «Bul bala da bola­shaq­ta Olım­­­pıada chempıony bolady. Soǵan jet­­kiz­sin», dedi. Zaldaǵy qalyń el de El­­ba­­sy sózin jaqsy yrymǵa balaǵany anyq. 2000 jyly Sıdneı Olımpıadasynyń chempıony bolǵan Bekzat Sattarhanov ta 1980 jyly Serik Qonaqbaev aǵasy Olım­pıa­danyń kúmis júldegeri atanǵanda be­sik­te jylaǵan eken. Anasy muny sol kez­de jaqsylyqqa joryǵanyn aıtqan. El­ba­synyń saltanatty sharadaǵy sózine biz de qo­sylyp, bolashaqta balanyń Olım­pıa­da chempıony bolýyna tilektestik bildirdik. Kezdesýde Prezıdent olımpıadalyq jeńiske úles qosqan árbir sportshyǵa, jattyqtyrýshylar quramyna, sport­shy­lardyń týystaryna tanytqan erik-jigerleri úshin alǵys aıtty. Osy rette ol sharaǵa qatysýshylarǵa sporttyq jetistikterdi eseleı túsý tile­gin jetkizdi. «Olımpıada chempıony úne­mi jattyǵýy kerek, sebebi, kelesi Olım­pıadaǵa deıin eshkim de bir orynda tur­maı­dy, ıaǵnı, barshasy daıyndyqtaryn jal­ǵastyrady», dedi. Osyǵan baılanys­ty Nur­sultan Ábishuly Olımpıada chempıon­dary men júldegerlerine ózderi týyp-ósken jerlerinde de syı-qurmettiń kór­seti­letinin, degenmen, osy ataq, qurmet­ke masat­tanbaı, belderin býyp, alda­ǵy jarys­tarǵa daıyndalyp júrý kerek­tigin aıtty. Kezdeýdiń sońynda Olımpıada chem­pıo­ny D.Eleýsinov Elbasyna Mem­lekettik Týdy tabys etti. Baqtııar TAIJAN, Dastan KENJALIN, «Egemen Qazaqstan» Sýretter Prezıdenttiń baspasóz qyzmetinen alyndy