Keshe Astanada Táýelsizdiktiń 25 jyldyǵy qarsańynda kelgen Konstıtýsııa kúni merekesi «Konstıtýsııa – qoǵam men memlekettiń serpindi jáne turaqty damýynyń negizi» atty halyqaralyq ǵylymı-praktıkalyq konferensııamen bastaý aldy.
Mártebeli merekelik sharaǵa QR Memlekettik hatshysy Gúlshara Ábdiqalyqova, Konstıtýsııalyq keńes tóraǵasy Igor Rogov, Joǵarǵy sot tóraǵasy Qaırat Mámı, Bas prokýror Jaqyp Asanov, Parlament Májilisiniń depýtattary, memlekettik qurylymdardyń basshylary men 10 elden jáne 6 bedeldi halyqaralyq uıymnan kelgen sheteldik qonaqtar qatysty.
Konferensııanyń ashylý saltanatynda sóz alǵan Memlekettik hatshy G.Ábdiqalyqova sharaǵa qatysýshylarǵa Qazaqstan Prezıdenti Nursultan Nazarbaevtyń Konstıtýsııa kúni merekesimen quttyqtaǵan hatyn oqyp berdi.
Munan soń konferensııada Joǵarǵy sot tóraǵasy Qaırat Mámı Ata Zań aıasynda sýdıalar korpýsynyń jumysyn saralap, sot júıesiniń 3 baǵyt boıynsha atqarǵan sharýalaryn tarqatty.
Al elimizdiń Bas prokýrory Jaqyp Asanovtyń aıtýynsha, bizdegi Ata Zań bar-joǵy 21 jyl ishinde myqty qalyptasyp, óz nátıjesin berip keledi.
Ǵylymı-praktıkalyq konferensııa búgin jalǵasady.
Talǵat RAIYMBEK,
«Egemen Qazaqstan»