Kenshiler astanasynda ishki ister organdarynyń qyzmetkerlerine 23 qyzmettik kóliktiń kiltteri tapsyryldy. Jalpy polısııa qyzmetkerleriniń jumysyna serpin berý jolynda oblystyq ákimdik qoldan kelgen kómekten aıanyp jatqan joq. Mysaly, bıyldyń ózinde tártip saqshylarynyń kerek-jaraǵyna bıýdjetten 10 mıllıard teńgege jýyq qarjy bólingen.
Polısııa qyzmetkerleriniń aldynda sóz sóılegen oblys ákimi Nurmuhambet Ábdibekov Memleket basshysynyń tapsyrmasy boıynsha óńirdegi quqyq qorǵaý organdarynyń kadrlyq quramy men materıaldyq-tehnıkalyq bazasyn nyǵaıtý úshin barlyq jaǵdaıdyń jasalyp jatqanyn atap ótti.
«Jalpy alǵanda, ishki ister organdarynyń materıaldyq-tehnıkalyq turǵydan jaraqtandyrylýy qylmys deńgeıiniń tómendeýine qatty áser etedi. Bólingen qyzmettik avtokólikter qoǵamdyq tártipti saqtaýdy nyǵaıtý men qylmyspen kúresti kúsheıtý jolynda aıtarlyqtaı septigin tıgizedi dep senemin», dedi óńir basshysy.
Ras, polısııaǵa degen kómek oblysta pármendi túrde júrgizilip keledi. Mysaly, bıyldyń ózinde oblys basshylyǵynyń tikeleı qoldaýynyń arqasynda jergilikti polısııa qyzmetiniń saptyq quram qyzmetkerlerine arnalyp 50 mıllıonnan astam teńgege 75 kópfýnksıonaldy beıne jáne aýdıo jazyp alý qondyrǵylary, sondaı-aq 19 mıllıon teńgege arttehnıkalyq qarý-jaraq satyp alynǵan.
«Ishki ister organdary qyzmetiniń qoǵamdyq tártipti, jol qaýipsizdigin jáne quqyqtyq tártipti qamtamasyz etýdegi negizgi basymdyqtaryn eskere otyryp, avtokólikterdiń deni oblys ortalyǵy men óńirlerde joǵaryda aıtylǵan mindetterdi iske asyrýshy qyzmet túrlerine bólinip beriletin bolady», dedi oblystyq ishki ister departamentiniń bastyǵy, general-maıor Mergenbaı Japparov.
Sonymen qatar, ol ózderine bólingen tehnıkanyń polısııa qyzmetkerleriniń aldyna qoıylǵan mindetterdi meılinshe tez sheshýge yqpalyn tıgizetinin atap ótti.
Qaırat ÁBILDINOV,
«Egemen Qazaqstan»
QARAǴANDY