Keshe Almaty qalasynda Túrki akademııasy halyqaralyq uıymy (TWESCO), Eýrazııa ǵylymı-zertteý ınstıtýty jáne Túrkııa Premer-mınıstri janyndaǵy Sheteldegi túrikter jáne týys halyqtar jónindegi basqarma birlesip uıymdastyrǵan «Eýrazııalyq jazǵy mektep» óz jumysyn aıaqtap, tyńdaýshylaryna arnaıy sertıfıkattar tabys etti.
Atalǵan jazǵy mektepke Ázerbaıjan, Belarýs, Germanııa, Grýzııa, Qazaqstan, Qyrǵyzstan, Túrkııa, О́zbekstan, Polsha jáne Ýkraınadan 20 magıstrant pen doktorant qabyldanǵan bolatyn. Olarǵa oqý baǵdarlamasy sheńberinde Túrkitildes elderdiń ekonomıkalyq ıntegrasııasy, kólik jáne ınfraqurylym jobalary, energetıka jáne sý qaýipsizdigi máseleleri, Kaspıı teńiziniń quqyqtyq mártebesi jáne aımaqtyq yntymaqtastyqtyń bolashaǵy, sondaı-aq Eýrazııada qaýipsizdik máseleleri taqyrybynda dárister oqyldy. Dáris oqyǵan sarapshylar da birqatar shetelderden shaqyrtylǵan. Atap aıtqanda, Qazaqstannan bólek, AQSh, Ázerbaıjan, Reseı, Túrkııadan kelgen mamandar túrli taqyryptar boıynsha leksııalar oqyp, pikir almasty.
Aıta ketý kerek, Jazǵy mektepti tabysty aıaqtaǵan qatysýshylar óz salasyndaǵy bilimi men tájirıbesin arttyryp, akademııalyq taldaý jasaý mashyqtaryn damytýǵa múmkindik aldy. Sonymen qatar, Almaty men Astanadaǵy Qazaqstannyń ishki jáne syrtqy saıasatyna baǵyt beretin irgeli uıymdardy aralap, jumysymen tanysatyn boldy.
«Egemen-aqparat»