Búgin Bas prokýratýrada «Qarjylyq tergep-tekserýdiń jáne urlanǵan aktıvterdi shetelden qaıtarýdyń ulttyq júıesin damytý» taqyrybynda dóńgelek ústel ótti, dep habarlaıdy egemen.kz baq.kz-ke silteme jasap. Onda shetelden urlanǵan aktıvterdi qaıtarý jobasy tanystyryldy.
«Jobany Bas prokýratýra múddeli quqyq qorǵaý júıesi jáne arnaıy organdarmen birlesip qolǵa aldy. BUU-nyń Esirtki jáne qylmystyq basqarmasynyń, EQYU AQSh elshiliginiń qoldaýyna ıe boldyq. Búginde Bas prokýratýra, Ulttyq bıýro, Memlekettik kirister komıteti jáne IIM qyzmetkerleriniń alǵashqy toby shet elderden kelgen sarapshylardan bilim aldy. Endi 10 ulttyq trener daıyndalmaq. Olardyń mıssııasy – Bas prokýratýra janyndaǵy Quqyq qorǵaý organdary akademııasynyń bazasynda tergeýshiler men prokýrorlar arasynda jańa ádistemelerdi taratý», - deıdi Bas prokýror Jaqyp Asanov.
Bas prokýror aktıvterdi qaıtarý boıynsha aqparat almasý jónindegi álemdik jelilermen jumys isteýge daıyn ekendikterin aıtty.
«Bas prokýratýra aktıvterdi qaıtarý boıynsha aqparat almasý jónindegi álemdik jeliler – Eýropada CARIN jáne Azııada ARIN-AP jelilerine qosylýǵa daıyn. Búkilálemdik bank pen BUU-nyń «Urlanǵan aktıvterdi qaıtarý boıynsha STAR bastamasyna qosylýǵa suraý jiberildi. Jýyrda STAR-dyń alǵashqy sholý mıssııasynyń ókilderimen kezdesý ótedi. Olar bizge jobany iske asyrýǵa kómektesedi», - deıdi Jaqyp Asanov.
Bas prokýror jumystyń taǵy bir mańyzdy baǵyty retinde parallel qarjylyq tergeý tujyrymdamasyn engizýdi atady.
«Árbir tergep-tekserý bastalǵan sátten bir mezgilde eki baǵytta qarjylyq qylmysty ashý jáne zańsyz kiristerdi qaıtarý jumystary júrgizilýi tıis. Sondyqtan sheteldik sarapshylardyń usynysy boıynsha urlanǵan aktıvterdi shetelden qaıtarý jáne parallel qarjylyq tergep-tekserý jónindegi vedomstvoaralyq jumys toby qurylady», -deıdi ol.