Elimizde alǵash ret tolyqtaı jasandy ıntellekt kómegimen jasalǵan mýltfılm kınoteatrdan kórsetildi. «Túrkistan saqshylary» atty joba shytyrman oqıǵalarǵa toly tartymdy sıýjetimen erekshelenedi, dep jazady Egemen.kz.
Alǵashqy serııasy «Tumar» televızııalyq syılyǵyna ıe bolǵan anımasııalyq týyndyny ázirleýge ketken shyǵyn ádepki mýltfılmderge qaraǵanda – 100 ese az. Osylaısha, joba avtory Ǵasyr Quralbaıuly JI arqyly da tolyqqandy dúnıe jasaýǵa bolatynyn dáleldeýge tyrysqan.
«Eń alǵashqy ıdeıa ótken jyldary Chatgpt sýretterdi durys shyǵaryp jatqanda oıǵa keldi. Sol kezde osy sýretterge anımasııany qosý týraly oıladym. Ideıamdy jergilikti telearna qoldaı ketti. JI arqyly mýltfılm ázirleý arqyly shyǵyndy jáne ýaqytty azaıttyq. Árıne JI-diń de anımasııa salasynda kemshiligi bar. Biraq ýaqyt óte kele bul da joıylady dep oılaımyn», deıdi Ǵasyr Quralbaıuly.
«Túrkistan saqshylary» balalarǵa eń aldymen týǵan jerge degen súıispenshilikti, ony qorǵaý jaýapkershiligin sezindirýdi maqsat etken. Bul mýltfılmde saqshy uǵymy tek kúsh pen batyrlyqty ǵana emes, adaldyqty, ádildikti, dostyqty jáne birlikke umtylýdy bildiredi. Mýltfılmde jasandy ıntellekt joba avtorlarynyń shyǵarmashylyq múmkindigin keńeıtetin qural retinde qoldanylǵan. Sondaı-aq JI ssenarııdi damytýda keıipkerlerdiń vızýaldyq obrazdaryn izdeý men keıbir anımasııalyq sheshimderdi jyldam synap kórýge septesken. Negizgi ssenarıı ózegin belgili Erjan Jaýbaı men О́mirbek Nyshanbek jazyp shyqqan. Uzaqtyǵy 50 mınýtty quraıtyn mýltfılm 3,5 aıda ázir bolǵan.
«Qazir JI barlyq shekarany buzdy. Endi shalǵaı aýylda turyp ta JI-men nebir týyndylardy jasaýǵa bolady, bastysy ınternet jáne qajet jazylymdar bolsa bolǵany», dedi Ǵasyr Quralbaıuly.
Elimizde alǵash ret tolyqtaı jasandy ıntellekt kómegimen jasalǵan mýltfılm Túrkistandaǵy kınoteatrda kishkentaı kórermen nazaryna tegin usynylǵan.