Qazaqstan Respýblıkasy Tuńǵysh Prezıdentiniń mýzeıinde kelýshilerge ýaqytsha jabyq turǵan esikter bar bolatyn. Endigi jerde ol esikterde qulyp turmaıtyn boldy. Búgin mýzeıde ótken baspasóz týrynda jabdyqtary jáne ıntereri bastapqy túrinde qaıtadan jańǵyrtylǵan Prezıdent N.Nazarbaevtyń shaǵyn jumys kabıneti men qabyldaý bólmesiniń alǵash ret esigi ashyldy. Jýrnalısterge bul kabınetterdiń tarıhy baıandaldy. Mysaly, Shaǵyn jumys kabınetinde Prezıdent beınekonserensbaılanys júıesiniń kómegimen selektorlyq keńes ótkizgen. Ol eki nemese birneshe tarappen dybystyq baılanysty júzege asyrýǵa múmkindik beredi. Qabyldaý bólmesine N.Nazarbaevtyń eńbekteri qoıylǵan jáne bul jerde estelikke sýretke túsý múmkindikteri de qarastyrylypty. Endigi jerde mýzeıge barlyq kelýshiler Elbasynyń Shaǵyn jumys kabınetin de, qabyldaý bólmesin de aralap kóre alady.
Sondaı-aq, týr barysynda baspasóz ókilderi mýzeıdiń ekspozısııa zaldarynyń taqyryptary jańarǵanynyń kýási boldy. Májilis zaly men Kúmbezdi zal foıesinde bul ózgeris birden bilinedi. Májilis zalynda ornalasqan «Qazaqstan Respýblıkasy: memlekettik damý strategııasy» ekspozısııasy qazirgi elimizdiń áleýmettik –ekonomıkalyq jáne saıası damýynyń baǵyttaryn aıqyndaıtyn materıaldardy jańasha qyrynan bergen bolsa, Kúmbezdi zal foıesindegi ekspozısııa túgeldeı jańartylǵan. Oryndalý tehnıkasy men materıaldary boıynsha júıelengen eksponattar aǵashqa, terige, shynyǵa, hrýstalǵa jańasha kózqaras qalyptastyryp, aıryqsha jaltyratylǵan altyn men kúmis, súıekke, nefrıtke oımyshtalǵan jibek jippen sheber kestelengen órnekter kelýshilerdi túrli áserge bóleıtini shúbásiz.
Aıgúl Seıilova
Foto Orynbaı Balmurat