Kókshetaýdaǵy keleli kezdesý

Kókshetaý qalasyna óziniń saılaýaldy baǵdarlamasymen tanystyrý úshin Qazaqstan prezıdenttigine Qazaqstannyń Kommýnıstik  halyqtyq partııasynan tirkelgen kandıdat Jambyl Ahmetbekov keldi. Munyń aldynda ol Qorǵaljyn aýdanynda bolyp, jerlesterimen kezdesken edi. QKHP OK hatshysy V.Kosarevtiń bastaýymen J.Ahmetbekov, Aqmola oblystyq partııa komıtetiniń hatshysy N.Samıgýlına, úmitkerdiń senim bildirilgen adamy V.Sorokın, basqa da belsendiler Kókshetaýdaǵy ortalyq saıabaqtaǵy V.I.Lenın eskertkishi men 1918-1921 jyldarǵy azamat soǵysynda qurban bolǵan kókshetaýlyqtar keshenine gúl shoqtaryn qoıdy. Jınalǵandar aldynda Jambyl Aýjanuly qysqasha sóz sóılep, baspasóz ókilderine sapar maqsaty jóninde shaǵyn suhbat berdi. Odan keıin prezıdenttikke kan­dı­dattyń seriktesteri qalanyń jetekshi kásiporny – «Tynys» aksıonerlik qoǵamynda bolyp, údemeli ındýs­trııa­lyq-ınnovasııalyq baǵyttaǵy jańa jeliler jumysymen tanysty, ónimder kór­me­sin tamashalady. Seh jumys­shy­larymen áńgime barysynda elimizdiń saıası júıesi, tarıfterdiń ósýi, turǵyn úımen qamtamasyz etý, jumysshy ma­man­dy­ǵynyń mártebesin kóterý máse­le­leri sóz bolyp, kóptegen suraqtarǵa jaýap qaı­taryldy. Sý, gaz eseptegish qu­raldar se­hy­nyń 50 adamdyq ujy­my­na úgit pa­raqshalary men kúntizbeler taratyldy. Kókshetaýdyń ortalyq bazarynda Jambyl Ahmetbekov satýshylarmen jáne tutynýshylarmen suhbat qurdy. Olar qozǵaǵan negizgi másele azyq-túlik taýarlaryna baǵanyń qymbattaýy bol­dy. J.Ahmetbekov prezıdent bola qal­ǵan jaǵdaıda baǵa saıasatyna yqpal ja­saıtyn oń tetikterdiń iske qosyla­ty­nyn, QKHP tarapynan sońǵy ýaqytta qolǵa alynǵan sharalar týraly baıan­dady. OK hatshysy Vladıslav Kosarev Aqmola oblysy ákimdigi tarapynan qolǵa alynǵan jaǵdaılarǵa toqtalyp, birshama isterdiń atqarylǵandyǵyn atap kórsetti. Qazir qalada kartoptyń kılosy 90 teńgeden satylyp jatsa, dástúrli jármeńkelerde ol 70 teńgeden aspaıtynyn quptarlyq qadam retinde baǵalady. Áıtkenmen, buǵan qanaǵat­ta­nýǵa bolmaıdy. Qaladaǵy №1 orta mektepte prezıdenttikke kandıdat Jambyl Ahmet­bekovtiń saılaýshylarmen kezdesýi boldy. Onda obkom hatshysy Náıla Samıgýlına jınalǵandardy úmitkerdiń ómir jáne qyzmet jolymen tanys­tyrdy. Odan keıin Jambyl Aýjanuly saılaýaldy baǵdarlamasynyń negizgi tirek-tutqalaryn baıandap berdi. – Men nege saılaýǵa baramyn? – dep ózine ózi suraq qoıdy prezıdenttikten úmitker. – Bizdiń basty maqsatymyz – qarapaıym halyqtyń únin, onyń úmitteri men nalasyn memlekettik bılikke jetkizý ǵana emes, qısyndy ta­laptaryna qulaq astyrtý. Aldaǵy saılaýda meniń basty qarsylasym kim bolmaq? Ol, árıne, qazaq­standyq­tar­dyń nemquraıdylyǵy der edim. Qo­ǵam­dy jaılaǵan únsizdik pen buqpantaılaý qoǵamdy kótere almaıdy, qulatýy da múmkin. Bul – barshamyzdyń kemshiligimiz. Erteńgi saılaý halqymyzdy silkiniske túsiredi dep senemin. Kezdesýge qatysýshylar jylý jáne sýmen qamtamasyz etý kásip­oryn­darynyń jumysyna, negizgi azyq-túlik ónimderine baılanysty baǵa qury­ly­myna, balalar ótemaqysyn ósirýge, bilim berý sapasyna, onyń qoljetim­diligine qatysty jáne kandıdat jeńgen jaǵdaıda memlekettik máselelerdi sheshýge partııanyń qatysýy týraly suraqtar qoıyldy. Buǵan basqosý qonaqtary tıisti jaýaptar qaıtardy. Baqbergen AMALBEK. Kókshetaý. ------------------------------------ Sýrette: «Tynys» AQ sehyndaǵy kezdesý.