Qardan músin turǵyzdy

Aýyl balalarynyń kóz­aıymyna aı­nalǵan ǵajaıyp músinderdiń avtory – jer­gilikti sharýshylyqtyń temir jonýshysy Serik Qoshqarbaev degen azamat.

Serik aldymen metaldan músinniń qańqasyn jasap alady. Odan keıin daıyn qańqanyń ishine qar toltyryp, artyǵyn jonyp, syrtyn sylap shyǵady.

«Bala kezimde plastılınnen búrkit, qaz, úırek tárizdi neshe túrli qustardyń músinshelerin jasaýdy jaqsy kóretinmin. Sodan qalǵan ádet qoı. 2021 jyly aýdan ortalyǵyndaǵy alańǵa jyl­qynyń, qyran búrkit ustaǵan ańshynyń, mýltfılm keıipkerleriniń músinin jasap berdim. Ol kezde eshbir syzbasyz músin jasaı beretinmin. Qazir ǵalamtordan kez kelgen janýardyń syzbasyn taýyp alýǵa bolady. Keıingi jyldary úıdiń aýlasyna músin jasap qoıatyn boldym. Aýyl balalary kelip tamashalap, sýretke túsip ketedi. Bıyl korsıkalyq ıttiń músinin jasadym. Jurttyń kóbi shyn ıt eken dep oılap qalady. О́tkende osy músindi kórgen bir tanysym qoryqqanynan jalma-jan kóligine qaıta kirip ketti», deıdi Serik.

Qar músinge jaratatyn shıkizat ázirleý ádisi de qyzyq. Sheber aıaq izi túspegen aq qardyń betin arshyp ulpasyn úlken astaýǵa úıedi de, ústinen jabysqaq kúıge jetkenshe azdap sý qosady.

«Birinshiden, mundaı qar­men jasalǵan fıgýra óte myqty keledi, kópke deıin turady. Ekinshiden, qar saz sııaqty jabysqaq bolǵandyqtan, birden ústi-ústine jabystyryp músin jasaı berýge bolady. Tek keıbir kedir-budyr tustaryn baltamen jonyp otyramyn. Qardan músin jasaýǵa aýa raıy da qolaıly bolý kerek. Men ádette 15–20 gradýs aıazda jumysqa kirisemin. Budan jyly bolsa, músin erip, qulaı beredi. Al qatty aıazda jarylyp ketedi. Aýladaǵy jumysym negizgi jumysymnan keıin, keshke jaqyn bastalady. Keıde aı jaryqta tún jarymǵa deıin sozylyp ketedi. Bul ýaqytta kún sýytyp, aıaz kúsheıe túsedi. Alaıda mundaıda aıazdy umytyp ketesiń. Oıyńdaǵy dúnıeniń árbir bólshegi kóz aldyńda týyp, músinniń sulbasy sát saıyn aıqyndala túsken saıyn arqań terge malshynyp, jumystyń qyzyǵyna berile túsesiń», deıdi qolóner sheberi.

Qostanaı oblysy