Qazaqstanda turǵyn úı alý nemese emdelý maqsatynda Biryńǵaı jınaqtaýshy zeınetaqy qory jınaǵynan merziminen buryn sheship alýǵa bolatyn qarajat kólemi qysqarýy yqtımal. Bul zeınetaqy jınaǵynyń jetkiliktilik shegin esepteý tásiliniń ózgerýine baılanysty, dep habarlaıdy Egemen.kz.
Jańa usynys boıynsha, endi jetkiliktilik shegin anyqtaýda burynǵy esepteý modeliniń ornyna medıanalyq jalaqy negizge alynýy múmkin. Qazirgi tańda onyń kólemi shamamen 340 myń teńgeni quraıdy.
Jetkiliktilik shegi – azamattyń zeınetaqy shotynda mindetti túrde qalýǵa tıis eń tómengi soma. Iаǵnı, osy mejeden asqan qarajatty ǵana turǵyn úı, ıpoteka nemese emdelý maqsatynda paıdalanýǵa bolady.
Zeınetaqy jınaǵynyń shekti deńgeıi ózgeredi: Endi aqsha qalaı esepteledi?
Qazirgi júıe boıynsha keıbir azamattardyń jınaǵyndaǵy birneshe mıllıon teńgeni merziminen buryn sheship ala alady. Alaıda jańa model engizilse, shotta kóbirek qarajat qaldyrý talaby qoıylýy múmkin.
Biryńǵaı jınaqtaýshy zeınetaqy qory málimetinshe, qazirgi esepteý tásili bolashaqta azamattarǵa jetkilikti deńgeıde zeınetaqy tóleýge tolyq kepil bola almaıdy. Qordyń baǵalaýynsha, eger adamdar jınaǵyn qazirgi shekke deıin azaıtsa, zeınetke shyqqan kezde tek kúnkóris deńgeıine jýyq tólem alýy yqtımal. Qazirgi eseppen bul shamamen 50 myń teńge kóleminde.
Jańa tásil halyqaralyq standarttarǵa jaqyndaýdy kózdeıdi. Iаǵnı, bolashaqta zeınetaqy mólsheri adamnyń burynǵy tabysynyń shamamen 40 paıyzyna teń bolýy qajet degen qaǵıda negizge alynbaq.
Zeınetaqy shegin kóterý jobasy qoǵamdyq talqylaýda qoldaý tappady
Sonymen qatar, merziminen buryn paıdalaný tetigi tolyq joıylmaıdy. Qazaqstandyqtar burynǵydaı turǵyn úı máselesin sheshýge nemese emdelýge qarjy ala alady. Biraq shotta jańa belgilenetin «qol suǵylmaıtyn» eń tómengi soma mindetti túrde saqtalýǵa tıis.