Shtabta jumys qyzǵan shaq

Saılaý óter kún jaqyndaǵan saıyn prezıdenttikten úmitkerlerdiń shtabtarynda qarbalas tirlik qaınaı túsken. Osy oraıda bizdiń tilshimiz prezıdenttikke kandıdat retinde  «Qazaqstannyń patrıottar partııasy»  qoǵamdyq birlestigi usynǵan Ǵanı Qasymovtyń Astanadaǵy saılaýaldy shtabynyń bas jetekshisi Gúldana Nurtilesovaǵa birneshe saýal qoıǵan edi. – Saılaýaldy úgit-nasıhat ju­mys­tary qalaı júrgizilip jatyr? Jalpy, sizdiń partııalastaryńyz óz kandıdattaryna qoldaýlaryn qalaı kórsetýde? – Qazirgi kúni respýblıka boıynsha barlyq oblystarda úmitkerimizge qol­daý kórsetetin shtabtar qurylyp, ju­mys júrgizip jatyr. Ǵanı Esengel­di­ulynyń senim bildirilgen adamdary bel­gili, shtabtardaǵy jumys týra qaı­naǵan qazandaı. Bir jaǵynan úgitshi-nasıhatshylarymyzben, bir jaǵynan baı­qaýshylarymyzben semınar-trenıng­ter ótkizip, endi bir jaǵynan BAQ-tarmen jumysty da úzdiksiz júrgizip jatyrmyz. Shtabtaǵy telefondarǵa da damyl joq, saılaýshylar habarlasyp, ózde­riniń Ǵanı Qasymovqa daýystaryn bergileri keletindikterin aıtýda. Olardyń jas mólsherleri de, mamandyqtary da ártúrli. Qarııalar men jastar, arasyn­da ǵalymdar, dárigerler, muǵalimder, óner adamdary da bar, kópshilik qoldaýlaryn bildirip jatyr. Sondaı-aq shtabtarda otyrǵan bizdiń kásibı zańgerlerimiz azamattarǵa qajetti keńes berip, olardyń muń-muqtajdaryn tyńdap, zań aıasynda qandaı qadamdar jasaý kerektigin aıtýda. – Al baıqaýshylar jumysy jaı­ynda ne aıtasyz? – Árıne, saılaý degen baıqaý­sh­y­lar­syz ótýi múmkin emes. Sondyqtan bizdiń árbir saılaý ýchaskelerimizde óz baıqaýshylarymyz bolady. Joǵaryda olarmen semınar-trenıngter ótkizilip jatqandyǵyn aıttym. Jáne de ol baı­qaýshylar tek ózimizdiń aramyzdan shyqqandarmen shektelmeı, úkimettik emes uıymdarmen qatar, shetelden kelgendermen tolyǵa túspek. – Ǵanı Qasymovtyń saılaý qory qurylǵan ba? Úgit-nasıhat jumys­ta­ry tek memleket bólgen qarajatpen ǵana júrgizilip jatyr ma, álde qordaǵy qarjy paıdalanylýda ma? – Memleket tarapynan zańǵa sáıkes bólingen qarajattyń deni buqaralyq aqparat quraldary arqyly úgit-na­sı­hat júrgizýge, ózge de úgit mate­rıa­l­da­ryn shyǵaryp, taratýǵa jumsalyp ja­tyr. Sosyn bizdiń partııa keremet baı partııanyń sanatyna jatpaıdy, son­dyq­tan, partııa tarapynan bólingen qara­jat jumsalyp jáne úgit sharalary partııamyzdyń qarapaıym múshelerinen qurylǵan eriktiler kúshimen ótýde. Olar shynymen tegin jumys istep júr. Naǵyz eńbek solardiki, naýryz týǵan­men, kóktem kele qoıǵan joq qoı, eriktilerimiz aq qar, kók muzda ýaqytpen sanaspaı tynymsyz saılaýaldy úgit-nasıhat jumystaryn júrgizýde. – Al  buqaralyq aqparat qural­dary tarapyna aıtylar renish joq pa, olardyń tarapynan eshqandaı alalaý, álde bir búırek burý sekildi jáıtter kezdespedi me? – Aqparat quraldaryna úlken rıza­shy­lyǵymyzdy bildiremiz. Gazetter bolsyn, telearnalar men  radıo bolsyn, barlyǵynyń da saılaýaldy úgit naýqa­nyna aralasýy óte joǵary deńgeıde. Ol jaǵynan eshqandaı olqylyq joq. – Áńgimeńizge kóp rahmet. Áńgimelesken Anar TО́LEÝHANQYZY.