Kandıdat halyq arasynda

Prezıdenttikten úmitker Ǵanı Qasymov ótken demalys kúnderinde de tynym tappaı, saılaýshylarmen birqatar kezdesýler ótkizdi. Onyń shtabyna kún saıyn óz problema­la­ry men aryz-shaǵymdaryn aıtyp on­daǵan almatylyqtar kelýde, ózde­riniń tirshilik túıtkilderin sheshý jóninde kómek kórsetýdi suraýda. Úmitkerdiń saılaýaldy shtaby, so­nymen birge, kandıdattyń saıası tuǵyr­namasymen egjeı-tegjeıli tanysqysy jáne Patrıottar partııasyna ótkisi keletinderdi de yqylaspen qarsy alýda. Osy kúnderde bes adam onyń belsendi jaqtaýshysyna aınaldy. Solardyń ishinde №109 orta mekteptiń qazaq tili muǵa­limi Nurgúl Jekebaeva da bar. «Maǵan prezıdenttikten úmitkerdiń memlekettik tildi damytý oraıyndaǵy kózqarastary unaıdy. Ol muǵalimderdi, bıýdjettik sala qyzmetkerlerin áleýmettik ja­ǵy­nan qorǵaýǵa úlken kóńil bólgen», – deıdi N.Jekebaeva. Ǵanı Qasymov ózi­niń jańa jaqtasyna saltanatty jaǵ­daıda partııa bıletin tapsyryp, ásem gúl shoǵyn syılady. Saılaýshylardyń kóńil kúıin jaq­sy­raq bilip, óz tuǵyrnamasynyń arqaý-qaǵıdattaryn olarǵa uǵynyqty jetkizý úshin Ǵanı Esengeldiuly qalalyqtar­dyń úılerine de kirip shyqqandy jón kórdi. Ǵanekeńdi Ábenovterdiń ynty­maq­ty otbasy óz páterinde jaımashýaq qarsy aldy. Otaǵasy Damır Kárimuly – respýblıkanyń eńbek sińirgen sáý­let­keri. Ol Medeý muz aıdynyn, kóptegen turǵyn úı jáne meımanhana keshenderin, sondaı-aq Almatydaǵy, Astana­daǵy, Túrkistandaǵy, Jańatastaǵy biregeı nysandardy jobalaýǵa qatysqan. Onyń uly Abaı da áke jolyn qýǵan sáýletker eken. Otanasy Ǵalııa Beı­se­n­baıqyzy – professor, Ortalyq Azııa ýnıversıteti ınjenerlik-tehno­logııa­lyq fakýltetiniń dekany. Sháı ústinde Almatynyń jáne elimizdiń basqa qalalarynyń sáýleti, sáýletker kadrlardy daıarlaý týraly áńgime órbidi. Damır Kárimuly otan­dyq talantty mamandardyń, ásirese jas­tardyń shet elge ketip jatqanyna ókinish bildirdi. Ǵanı Esengeldiuly bizdiń tarıhy­myz­dyń, rýhanııatymyzdyń, tilimiz ben mádenıetimizdiń qaınar bulaǵy bolyp tabylatyn  aýyldy kóterýdi shyndap qolǵa alý qajettigine toqtaldy. Ol keń-baıtaq jerimizde ujymdyq sharýa­shylyqtar qurmaıynsha, memleket qar­jy­synyń kómegi berilmeıinshe aýyldy kóterý múmkin emes dep esepteıdi. Sol úshin de óńdeýshi ónerkásipti damytyp, nyǵaıtý kerek. Jastardyń aýyldan ketip qalmaýy úshin jas otbasylarǵa tegin jer telimderin berip, sharýashylyq júr­gizý úshin paıyzsyz nesıe bólgen abzal. Ǵ.Qasymov budan soń qala kóshele­rinde óz saılaýshylarymen emin-erkin aralasyp, emen-jarqyn áńgimelesti. Jeksenbi kúni Jibek joly kóshesi boıyndaǵy «Almaty Arbatynda» boldy. Almaty Arbatynda serýendep júrgen qalalyqtar prezıdenttikten úmitkerdi tanyp, amandasyp, oǵan aldaǵy saılaýda tabys tiledi. Qorǵanbek AMANJOL. Almaty. ------------------------------------ Sýretti túsirgen Bersinbek SÁRSENOV.