Aqtaýdaǵy gýmanıtarlyq kolledjdiń aldyndaǵy avtobýs aıaldamasy janynda qońyr tústi mármármen qaptalǵan stela tur.
Úsh búıirli stelanyń bir jaǵynda «2017 jylǵy urpaqtarǵa Mańǵyshlaqty ıgerýshilerden» degen jazý bolsa, ekinshi jaǵynda «7 qarasha 1967 jyl» dep belginiń qoıylǵan ýaqyty men «7 qarasha 2017 jyl» dep ashylatyn ýaqyty jazylyp, úshinshi jaǵyna oraq pen balǵa sýreti belgilengen.
Bul stela 1967 jyly qarasha aıynda, sol kezde toılanǵan «Uly Oktıabr sosıalıstik revolıýsııasynyń 50 jyldyǵy» merekesi kezinde qoıylǵan eken. Jarty ǵasyr buryn bolǵan jaıttyń kýágeri – sol kezderi Shevchenko qalalyq atqarý komıteti halyq depýtattar keńesi saýda jáne sharýashylyq bóliminiń meńgerýshisi bolǵan Lıýdmıla Mýhortova «Shevchenko qalalyq atqarý komıteti kótergen bastama qoldaý taýyp, shara Sosıalıstik Eńbek Erleri, óndiris ozattary, munaıshylar, mektep oqýshylary men ustazdarynyń qatysýymen saltanatty jaǵdaıda ótkizildi», deıdi.
2017 jylǵy býynǵa hat jazylǵan uzyndyǵy jarty metrlik kapsýlany №1 orta mekteptiń oqý ozattary – Artýr Kamalıdenov pen Marına Ostapenko salǵan.
Lıýdmıla Nıkolaevna stelanyń ashylýyn jergilikti ákimdiktiń nazardan tys qaldyrmaı, kózi tiri kýágerlerdi shaqyryp, saltanatty jaǵdaıda ashyp, hatty jas býynǵa oqyp bergenin qalaıdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy