Búgin, 7 aqpan kúni Italııanyń Mılan qalasynda XXV Qysqy Olımpıada oıyndary bastaldy. Alǵashqy jarys kúninde alty otandasymyz eki sport túrinen óner kórsetti, dep jazady Egemen.kz.
Birinshi kúnniń baǵdarlamasynda áıelder arasynda skıatlon saıysy (10 shaqyrym + 10 shaqyrym) ótti. Qazaqstan quramasynyń atynan eki sportshy jarys jolyna shyqty. Ksenııa Shalygına 53-orynǵa taban tirese, Nadejda Stepashkına 60-oryndy ıelendi.
Taǵy bir jarys túri – konkımen júgirýden áıelder arasynda 3000 metr qashyqtyqta júldeler sarapqa salyndy. Bul baǵdarlamada Qazaqstan atynan eki sportshy óner kórsetti. Ekeýi de úzdik ondyqtyń qataryna endi.
Nadejda Morozova 4:01.200 ýaqyt kórsetkishimen altynshy bolyp márege jetti. Al Elızaveta Golýbeva 4:03.300 ýaqyt kórsetkishimen onynshy orynǵa turaqtady.
Eske salaıyq, 2026 jylǵy Olımpıada oıyndary 6-22 aqpan aralyǵynda Italııanyń Mılan jáne Kortına-d’Ampesso qalalarynda ótedi. Baıraqty básekede 16 sport túri boıynsha 116 medal jıyntyǵy sarapqa salynady.
Buǵan deıin habarlaǵanymyzdaı, Mılan-Kortına Olımpıadasynda el namysyn 10 dıssıplınada 36 sportshy (18 er, 18 áıel) qorǵaıdy. Jalpy dodaǵa 93 memleketten 3000-ǵa jýyq atlet qatysady.