Almaty qalasynda elektrosamokattardy paıdalaný tártibin retteý jáne jol qozǵalysy qaýipsizdigin kúsheıtý máselelerine arnalǵan jumys keńesi ótti. Is-sharaǵa polısııa departamenti, prokýratýra, qala ákimdigi basshylyǵy, sondaı-aq kıksherıng qyzmetin usynatyn kompanııalardyń ókilderi qatysty, dep habarlaıdy Egemen.kz.
Keńes barysynda elektrosamokattardy kólik quraly retinde resmı tanýǵa baǵyttalǵan zańnamalyq ózgerister qaraldy. Atap aıtqanda, 1 shildeden bastap jalǵa beriletin elektrosamokattarǵa qatysty biryńǵaı jáne mindetti talaptar engiziledi. Sonymen qatar, bıznes sýbektileri úshin ótpeli kezeń qarastyrylǵany aıtyldy.
Toqaev Úkimetke elektrosamokatqa qatysty máseleni qaıta qaraýdy júktedi
Jıynda jol-kólik oqıǵalarynyń aldyn alý, paıdalanýshylardyń tártibin baqylaý, sıfrlyq qadaǵalaý tetikterin engizý, sondaı-aq kıksherıng operatorlarynyń jaýapkershiligin arttyrý máselelerine basymdyq berildi. Mamandar balamaly kólik túrleriniń keńinen qoldanylýy jol-kólik oqıǵalary men ákimshilik quqyq buzýshylyqtardyń ósýimen qatar júrip jatqanyn atap ótti.
Almaty qalasy polısııa departamentiniń bastyǵy Aıdyn Qabdýldınovtyń aıtýynsha, basty maqsat − qalalyq mobıldilikti shekteý emes, ony qaýipsiz ári tıimdi basqarý.
«Elektrosamokattar búginde jol qozǵalysynyń tolyqqandy qatysýshysyna aınaldy. Sondyqtan olarǵa qoıylatyn talaptar da basqa kólik quraldaryna arnalǵan erejeler sekildi naqty ári mindetti bolýy tıis», dedi ol.
Polısııa derekterine sáıkes, 2025 jyly Almatyda elektrosamokattardyń qatysýymen 386 jol-kólik oqıǵasy tirkelip, 400-den astam adam jaraqat alǵan. Sonymen qatar, jol erejesin buzǵan samokat paıdalanýshylaryna qatysty 24 myńnan astam ákimshilik hattama toltyrylyp, 10 myńnan asa elektrosamokat arnaıy turaqtarǵa qoıylǵan.
Astanada elektrosamokattarǵa arnaıy turaqtar ashylady
Keńes aıasynda kıksherıng operatorlaryna qoıylatyn jańa talaptar da talqylandy. Olardyń qatarynda mindetti saqtandyrý engizý, elektrosamokattardy nómirlik belgilermen jabdyqtaý, geozonalaý júıesin qoldaný jáne Ishki ister mınıstrliginiń derekqorlarymen ıntegrasııalaý máseleleri bar.
Aıdyn Qabdýldınovtyń sózinshe, mopedterdi retteý tájirıbesi qatań ári júıeli sharalardyń tıimdi ekenin kórsetken.
«Mundaı tásil jol-kólik oqıǵalaryn azaıtyp, tártipti kúsheıtedi. Dál osy ádis elektrosamokattarǵa da qoldanylady. Bul – azamattardyń ómiri men densaýlyǵyn qorǵaýǵa baǵyttalǵan mańyzdy qadam», dedi ol.
Kezdesý qorytyndysy boıynsha taraptar yntymaqtastyqty jalǵastyrýǵa, profılaktıkalyq sharalardy kúsheıtýge jáne jańa talaptarǵa bıznes pen paıdalanýshylardyń kezeń-kezeńimen beıimdelýin qamtamasyz etýge ýaǵdalasty.