Ulttyq mýzeıde sýretshi Ańsaǵan Mustafanyń «Sóıle, sýret» atty jeke kórmesi kópshilik nazaryna usynyldy. Bul kórme sýretshiniń shyǵarmashylyq jolyndaǵy 200-shi mereıtoılyq ekspozısııasy, dep habarlaıdy Egemen.kz.
Kórmeniń ashylýynda sóz sóılegen Ulttyq mýzeı dırektory Berik Ábdiǵalıuly buǵan deıin mýzeı qabyrǵasynda kóptegen halyqaralyq deńgeıdegi kórme ótkenin atap ótip, bul joba da kórermenniń joǵary qyzyǵýshylyǵyna ıe bolatynyna senim bildirdi.
«Ańsaǵan Mustafanyń týyndylary adamdy oılanýǵa, qoǵamdaǵy ózgeristerge tereńirek úńilýge jeteleıdi. Ulttyq mýzeı mundaı shyǵarmashylyq bastamalardy únemi qoldap, qoǵamdaǵy ózekti máselelerdi óner arqyly kóterýge múmkindik berip keledi», dedi ol.
Kórme ekspozısııasyna avtordyń zamanaýı qoǵamdaǵy mańyzdy áleýmettik taqyryptardy arqaý etken 70-ke jýyq grafıkalyq jumysy qoıylǵan.
Sýretshi óz eńbekterinde áleýmettik jeli dáýirindegi jalǵyzdyq, tehnologııaǵa táýeldilik, adamdar arasyndaǵy qarym-qatynas, otbasy qundylyqtarynyń álsireýi, jumyssyzdyq, qarjylyq qıyndyqtar men sıfrlyq táýeldilik sııaqty ózekti máselelerdi kórkem tilmen beıneleıdi.
Sýretshiniń aıtýynsha qoǵamdaǵy atalǵan máseleler tek jergilikti emes, jahandyq sıpat alyp otyr.
Sondaı-aq Májilis depýtaty Dáýlet Káribek kórmeniń mazmunyna toqtalyp, áleýmettik jeliniń adamnyń oılaý júıesine áseri týraly pikir bildirdi. Onyń aıtýynsha, adam tutynatyn aqparat onyń dúnıetanymyna tikeleı yqpal etedi, sondyqtan aqparattyq keńistikti tańdaýda saq bolý mańyzdy.
«Ańsaǵan Mustafanyń shyǵarmashylyǵy – búgingi qoǵamnyń aınasy ispetti. Bul týyndylar ár kórermendi oılandyryp, óz tańdaýyna syn kózben qaraýǵa jeteleıdi», dedi ol.
2014 jyly Astanada bastaý alǵan «Sóıle, sýret» jobasy keıin Qazaqstannyń barlyq óńirinde tanystyrylyp, shetelderde de jalǵasyn tapqan. Búginde sýretshiniń eńbekteri álemniń 30-dan astam elinde kórermenge usynylǵan.
Kórme Ulttyq mýzeıdiń 6-qabatynda 2026 jylǵy 19 mamyrǵa deıin kelýshilerge ashyq bolady.