Qazaqstannyń densaýlyq saqtaý júıesinde jasandy ıntellekt tehnologııalaryn kezeń-kezeńimen engizýge arnalǵan jańa normatıvtik qujat ázirlendi. Bul bastama medısınalyq qyzmetterdiń sapasy men tıimdiligin arttyrýǵa baǵyttalǵan, dep jazady Egemen.kz.
Densaýlyq saqtaý mınıstrliginiń málimetinshe, qujat Memleket basshysynyń Joldaýynda berilgen tapsyrmany oryndaý sheńberinde daıyndalǵan. Onda jasandy ıntellekt arqyly medısınalyq qyzmetterdiń sapasy men kólemin monıtorıngteýdiń jańa júıesin qalyptastyrý mindeti kózdelgen.
Jańa tártip densaýlyq saqtaý salasyna JI engizýdiń ashyq, qaýipsiz jáne ǵylymı negizdelgen modelin qalyptastyrýǵa baǵyttalǵan. Sonymen qatar sheshimderdiń klınıkalyq jáne ekonomıkalyq tıimdiligin mindetti túrde baǵalaý qarastyrylǵan. Bul olardyń praktıkalyq qoldanysyn jáne keń aýqymda engizilý turaqtylyǵyn qamtamasyz etedi.
Qujatta jasandy ıntellekt júıelerin engizý men paıdalanýdyń biryńǵaı tásilderi belgilengen. Ol medısınalyq buıym retinde qarastyrylatyn baǵdarlamalyq sheshimderdi de, sondaı-aq basqarýshylyq jáne ákimshilik prosesterde qoldanylatyn klınıkalyq emes quraldardy da qamtıdy.
Salada alǵash ret JI tehnologııalaryn engizýdiń kezeń-kezeńimen júzege asyrylatyn naqty algorıtmi aıqyndaldy. Ol ótinim berýden bastap tehnologııalyq daıyndyqty baǵalaý, pılottyq synaqtan ótkizý, qajet bolǵan jaǵdaıda tirkeý rásimderi men senimdi sheshimder tizbesine engizý jáne keıingi keńeıtý kezeńderin qamtıdy.
«Ascle» jobasy: Jasandy ıntellekt dáriger qabyldaýyndaǵy kezekti azaıtýǵa kómektesedi
Qujatta sheshimderdiń tıimdiligi men qaýipsizdigin dáleldeýge erekshe mán berilgen. Bıoetıkalyq saraptama, klınıkalyq valıdasııa jáne densaýlyq saqtaý tehnologııalaryn baǵalaý tetikteri engiziledi. Pılottyq jobalar barysynda algorıtmderdiń dáldigi men sezimtaldyǵy, olardyń klınıkalyq sheshimderge yqpaly jáne medısına qyzmetkerleriniń júktemesine áseri jan-jaqty taldanady.
Sonymen birge, senimdi jasandy ıntellekt júıeleriniń tizbesin qalyptastyrý jáne olardy engizgennen keıingi monıtorıng júıesin damytý kózdelgen. Bul júıelerdiń qaýipsizdigi men tıimdiligi turaqty baqylaýda bolady.
Qujat aqparattyq qaýipsizdik pen derbes derekterdi qorǵaý talaptaryn kúsheıtýdi, sondaı-aq barlyq qatysýshylardyń – ázirleýshilerden bastap medısınalyq uıymdar men paıdalanýshylarǵa deıin – jaýapkershiligin naqtylaýdy qarastyrady.
Mınıstrlik ókilderiniń aıtýynsha, jańa buıryq teńgerimdi retteýshi orta qalyptastyryp, jasandy ıntellekt tehnologııalaryn qaýipsiz ári baqylanatyn túrde engizýge múmkindik beredi. Bul óz kezeginde Qazaqstannyń densaýlyq saqtaý júıesin sıfrlyq transformasııalaýdy jedeldetýge jol ashady.
Jasandy ıntellekt ınsýlttan bolatyn ólim-jitimdi 40%-ǵa tómendetken