Mysyrdyń kólik qurastyrýshy kásiporyndary 2017 jyly tolyǵymen Mysyrda jasalǵan jáne rekordty tómen baǵada bolatyn jańa kólik modelin usynýǵa ýáde etýde, dep habarlaıdy QazAqparat "Al-Ahram Ebdo" basylymyna silteme jasap.
Kóliktiń tehnıkalyq sıpattamalary, kólemi jáne ataýy ázirge qupııada ustalýda. Degenmen, jańa model tanystyrylatyn kún belgilenip qoıǵan - 2017 jyldyń 30 maýsymy.
Marketıngilik zertteýler 92 mıllıonnan astam halqy bar memleket úshin taza mysyrlyq avtony qurastyrý qajettiligi burynnan týyndaǵanyn aıtýda.
Sarapshylardyń paıymynsha, kóliktiń baǵasy rasymen de, básekeden tys bolady. Sebebi, 2016 jyldyń sońynda jergilikti valıýta - mysyrlyq fýnt AQSh dollarymen salystyrǵanda eki eseden astamǵa arzandady.
Buǵan deıin mysyrlyq ınternet-BAQ-tar elde úndistandyq Nano kóliginiń klonyn qurastyrý isi qolǵa alynatyndyǵyn habarlaǵan bolatyn. Kólik arnaıy ystyq klımat úshin jasap shyǵarylǵan. Ol 30 shaqyrymǵa 1 lıtr benzın tutynady, barynsha joǵary jyldamdyǵy saǵatyna 90 shaqyrym.