24 naýryzda Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev Eýropalyq Odaqtyń Ortalyq Azııa elderi jáne Grýzııa boıynsha arnaıy ókili Per Moreldi qabyldady.
Taraptar Qazaqstan – Ortalyq Azııa – Eýropalyq Odaq pishinindegi qarym-qatynastyń qazirgi kúıi men perspektıvalaryn, aǵymdaǵy jyldaǵy Qazaqstan – Eýropalyq Odaq saıası únqatysýynyń basymdyǵy men maqsattaryn, elimizdiń «Eýropaǵa jol» memlekettik baǵdarlamasynyń jáne Eýropalyq Odaqtyń Ortalyq Azııadaǵy strategııasynyń iske asyrylýyn, energetıka men qorshaǵan ortany qorǵaý salasyndaǵy máselelerin talqylady. Erekshe nazar Qazaqstannyń 2010 jylǵy EQYU-ǵa tóraǵalyǵynyń qorytyndysyna jáne Qazaqstan – EO arasyndaǵy jańa negizdemelik kelisimdi jasasý máselesine aýdaryldy.
Q. Saýdabaev atap kórsetkendeı, qazirgi tańda Qazaqstan alda ótetin kezekten tys prezıdenttik saılaýdy halyqaralyq standarttarǵa saı ótkizýge úlken kóńil bólýde.
Taraptar sondaı-aq ózekti aımaqtyq jáne halyqaralyq máseleler boıynsha keń aýqymdy pikir almasty, dep habarlady QR SIM-iniń baspasóz qyzmeti.