Kásipkerlik obektilerin tekserý 3 ese qysqardy. Bul jóninde QR Ulttyq ekonomıka mınıstrliginiń Tutynýshylardyń quqyǵyn qorǵaý komıteti tóraǵasynyń orynbasary, QR Memlekettik sanıtarııalyq bas dárigeri Jandarbek Bekshın QR Bas prokýratýrasynda ótken kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jasaý jónindegi keńes otyrysynda málimdedi.
«Kásipkerlik obektilerin tekserý 3 ese qysqardy. 2014 jyly árbir sala boıynsha 112 tekserý paraǵy boldy. 2015 jyly 1 keshendi tekserýge qysqartý usynyldy. 2016 jyly olardy 45 tekserýge deıin qaıta kóbeıtý usynyldy. Iаǵnı biz tekserý paraqtaryn jyl saıyn ózgertip otyramyz. Alaıda, olardaǵy talaptar sanıtarııalyq qaǵıdalar men normalardan alynady, tekserý paraqtarynan tys eshqandaı baqylaý júrgizilmeıdi. Osyǵan erekshe nazar aýdarý qajet dep sanaımyn», - dep málimdedi J.Bekshın.
Elimizdiń bas dárigeriniń aıtýy boıynsha, kameraldyq baqylaýdy engizýdiń, ónimdi irikteýdiń arqasynda tamaq óniminiń qaýipsizdigin bızneske áser etpeı baqylaýǵa múmkindik beredi.
Memlekettik dáriger atap ótkendeı, tekserý paraqtary, sanıtarııalyq qaǵıdalar men normalar «Atameken» UKP-men jáne QR UEM-de tirkelgen 30 qaýymdastyqpen kelisilip otyrǵan.
«Biz osynyń barlyǵyn birlesip jasadyq. Alaıda, ýaqyt óte kele, tamaq ónimi óndirisinde nanotehnologııalar paıda bolýda. Árıne, biz nanoónimdi baqylaý jónindegi sanıtarııalyq qaǵıdalardy ǵylymı túrde qarastyratyn bolamyz», - dedi J.Bekshın.