Parlament Májilisindegi «Jańa Qazaqstan» depýtattyq toby men jastardyń «Baı-Barys» ıntellektýaldyq klýbynyń músheleri birigip «Bolashaqtyń irgesin birge qalaımyz!» Joldaýyn jastardyń kózqarasymen jańasha taldaǵan dóńgelek ústel ótkizdi.
Májilis depýtaty Lıýdmıla Hochıeva betashar sóz sóıledi. L.N.Gýmılev atyndaǵy Eýrazııa ulttyq ýnıversıtetiniń stýdenti Álkeı Marǵulanuly dóńgelek ústelge moderatorlyq jasady. Ol Qazaqstan Respýblıkasynyń halyqaralyq qoǵamdastyqtaǵy orny men aldaǵy ýaqyttaǵy syrtqy saıası basymdyqtaryna erekshe toqtalyp, onyń ulttyq qaýipsizdikke, qoǵamnyń damýyna, eń bastysy, memleketimizge áseri haqyndaǵy suraqtarǵa jaýap retinde «Syrtqy pragmatızm – Qazaqstan dıplomatııasynyń negizi» dep atalatyn taqyrypta baıandama jasady.
Eýrazııa ulttyq ýnıversıtetiniń stýdentteri Ashat Ataý «Ekonomıkalyq damý arqyly sapaly damý jolynda», Músilim Hasenov «Áleýmettik modernızasııa» degen taqyryptardy taldap sóıledi.
«2020 jylǵa qaraı baǵyttalǵan ǵylymı-tehnologııalyq damýdy sapaly júrgizý úshin Eýropa elderinde, Japonııa, AQSh, Qytaı jáne Reseıde qyzmet tájirıbesinde Forsaıt ádistemesi qoldanylyp keledi. Forsaıttyń máni «bolashaq jaıly oılanýda» ǵana emes, bolashaqty talqylaýda, onyń kórinisin qalyptastyrý men qabyldanǵan úlgige qol jetkizý jolynda kúsh jumyldyrýda. Bul úderiske ondaǵan, júzdegen, myńdaǵan adamdar tartylady. Qandaı da bir ekonomıka sektorynyń damýy, nemese qaladaǵy nemese oblystaǵy áleýmettik-ekonomıkalyq jaǵdaıdyń is barysy solarǵa baılanysty. Bir artyqshylyǵy – eshqandaı syrtqy májbúrleý kúshimen emes, tabıǵı túrde baǵdarlanatyn bolady. Forsaıt – qazirgi qoǵam múshelerin olardyń jaýapkershiligi arqyly sypaıy túrde «birlesip basqarý».
Qazaqstan óz ekonomıkasynda básekege qabiletti ártaraptandyrý saıasatyn ustanýy qazirgi zaman talabyna saı keledi, alaıda eldiń múmkinshiligin eskere otyryp, perspektıvada qaıtarymy mol bolatyn salalarǵa basty kúsh jumsalýy qajet. Álemdegi iri ekonomıka sarapshysy Maıkl Porter Qazaqstannyń álemde básekege qabiletti bolýyna múmkindik beretin 5 basym salany bólip shyǵardy. Olar: munaı hımııasy, metallýrgııa, máshıne jasaý, týrızm, atom energetıkasy.
Dóńgelek ústelge qatysýshy Májilis depýtattary men klýb músheleri baıandamashylarǵa suraq qoıyp, taqyryptardy keńinen talqylady. Sondaı-aq dóńgelek ústelde jastar saıasaty, taza aýyz sý men turǵyn úı máseleleri de sóz boldy. «Bolashaqtyń irgesin birge qalaımyz!» Joldaýyn taldaǵan dóńgelek ústelge qatysýshylar usynymdar qabyldady. Onda «Memlekettik jastar saıasaty týraly» Zańdy jetildirý jaıy da nazardan tys qalǵan joq. Bul oraıda ultty básekege qabiletti etý baǵytynda tárbıeleıtin úlken baǵdarlama qajet ekeni de atap kórsetildi.