Aqorda rezıdensııasynda HHV Qysqy Olımpıada oıyndarynyń jeńimpazy Mıhaıl Shaıdorov pen onyń jattyqtyrýshylaryn marapattaý rásimi ótti, dep jazady Egemen.kz.
Prezıdent Qasym-Jomart Toqaev saltanatty is-sharada sóılegen sózinde Qazaqstan úshin bul Olımpıadanyń orny erekshe ekenin aıtty.
«Otandasymyz Mıhaıl Shaıdorov tamasha óner kórsetti. Mánerlep syrǵanaýdan altyn medalǵa ıe bolyp, kók Týymyzdy Olımp shyńyna kóterdi. Sondyqtan Mıhaılǵa alǵysymdy bildirip, qutty bolsyn degim keledi. Aqordada jınalyp otyrǵan adamdarǵa, eń aldymen, Mıhaıldyń ákesi men jeńimpazdyń bapkerine rızashylyǵymdy aıtamyn. Barshańyzdy taǵy da shyn júrekten quttyqtaımyn! Sizder qajyrly jáne tabandy eńbektiń arqasynda Mıhaıldy myqty sportshy, naǵyz daryn ıesi retinde búkil álemge pash ettińizder. Halqymyz Mıhaıldy maqtan tutady, al jas býyn odan úlgi alady. Olımpıada jeńimpazy bolý – bıik maqsat jolynda kez kelgen qıyndyqty jeńý, ıaǵnı, uzaq ári kúrdeli jolǵa daıyn bolý degen sóz. Temirdeı tártippen kún saıyn tynymsyz jumys istegen adam ǵana zor tabysqa jeteri anyq», dedi Memleket basshysy.
Mıhaıl Shaıdorov – Olımpıada chempıony!
Qasym-Jomart Toqaev Mıhaıl Shaıdorovtyń jeńisi elimiz úshin teńdesi joq jetistik sanalatynyna nazar aýdardy.
«Birinshiden, bul – kópten kútken, ıaǵnı, 32 jyldan keıin qol jetkizgen tarıhı júlde. Ekinshiden, bul – mánerlep syrǵanaýdan el qorjynyna túsken alǵashqy Olımpıada altyny. Úshinshiden, kúlli álem elimizde áıgili sportshy Denıs Tenniń jolyn jalǵastyratyn daryndy jastardyń bar ekenine kýá boldy. Mıhaıl Shaıdorovtyń Olımpıadada kórsetken keremet óneri, sózsiz, tarıhı jetistik, naǵyz trıýmf. Kortına d’Ampesso muz aıdynynda otandasymyzdyń juldyzy jarqyrady. Bul – Olımpıada chempıonynyń ózin-ózi shyńdap, óz kúshine sengeniniń, mánerlep syrǵanaý sııaqty asa qıyn sport túrine degen erekshe mahabbatynyń jemisi», dedi Prezıdent. Prezıdent Olımpıada chempıonynyń ákesi ári alǵashqy bapkeri Stanıslav Shaıdorovtyń eńbegine aıryqsha toqtaldy «Stanıslav Aleksandrovıch – mánerlep syrǵanaýdan Qazaqstannyń birneshe dúrkin chempıony. Ákesi, tuńǵysh bapkeri retinde Mıhaıldyń muz aıdynyndaǵy alǵashqy qadamyn jasaýǵa kómektesip, ómirdiń eń qıyn sátterinde árdaıym ulynyń janynda bolǵan adam. Memleket basshysy retinde Qazaqstan Respýblıkasynyń kók Týyn álemniń basty sport arenasynda bıik jelbiretken osyndaı uldy, otanshyl azamatty tárbıelegenińiz úshin Sizge shyn júrekten alǵys aıtamyn. Baspasóz betindegi suhbatyńyzdy oqyp shyqtym. Mıhaıldan meıirimińizdi aıamaı, talantty perzentińizdiń sporttaǵy erekshe mıssııasyna tıtteı de kúmán keltirmeı, ákelik paryzyńyzdy adal ári laıyqty atqardyńyz. Bıik shyńǵa aparar buralań joldan birge óttińizder. Endi sol taban aqy, mańdaı terdiń jemisin kórip, qurmet pen qoshemetke bólenip jatsyzdar. Búginde halqymyz Sizderdi ardaq tutady. Otanshyldyqtyń naǵyz úlgisin kórsetkenderińiz úshin elimiz Sizderge rızashylyǵyn bildiredi. Jurtshylyqtyń alǵaýsyz alǵysy men qurmetine men de qosylamyn», dedi Qasym-Jomart Toqaev.Prezıdent chempıonnyń bapkeri, áıgili sportshy, 1994 jylǵy Olımpıada jeńimpazy, álem chempıony Alekseı Ýrmanovqa ystyq yqylasyn bildirdi.
«Mánerlep syrǵanaý sportyndaǵy bilikti maman retinde eren jetistikterińizdi jalǵaıtyn laıyqty izbasar daıyndadyńyz. Sol úshin Sizge zor alǵys aıtamyn. Osynaý tamasha tabysqa salalyq mınıstrlik, federasııa, sondaı-aq ataqty boksshymyz, jaqynda esimi Dúnıejúzilik boks dańqy zalyna jazylǵan Gennadıı Golovkın basqaratyn Ulttyq Olımpıada komıteti eleýli úles qosty. Otandastarymyz sporttyq básekeniń qıyndyqtaryn, ásirese, erkin baǵdarlamadan keıingi Mıhaıldyń kúrdeli jaǵdaıyn tebirenispen baqylap otyrdy. Biraq ol táýekelge baryp, jer-jahannyń basty baıraqty básekesindegi jeńisti julyp aldy. Bul da kezdeısoq emes. О́zine berilgen jalǵyz múmkindikti ekiniń biri sátti paıdalana almaıdy. Ádette jarysqa túskende «baq shaba ma, bap shaba ma» dep jatady. Biraq «eńbek – bárin de jeńbek» degen ulaǵatty da umytpaıyq. Mıhaıldyń jeńisi myńdaǵan jastarymyzdy sportpen shuǵyldanýǵa jigerlendirdi. Eńbek etseń, erik-jigeriń muqalmaı, batyl áreket qylsań, kez kelgen, tipti qol jetpesteı kórinetin armannyń ózi oryndalatynyna senimin kúsheıtti. Búginde elimizdegi myńdaǵan ul-qyz Mıhaıl Shaıdorovqa qyzyǵa qarap, elikteıdi, dańqty sportshy bolǵysy keledi. Demek elimizdiń ulandary álemdik sporttyń bıiginde jarqyraı kórinetin kún alda. Barsha Olımpıada chempıondarynyń aty álem sportynyń jylnamasyna jazylady, olardyń jetistikteri Lozannadaǵy Halyqaralyq Olımpıada komıtetiniń mýzeıinde tirkeledi. Endi túrli eldiń týrısteri Mıhaıl Shaıdorovtyń 2026 jylǵy Olımpıadadaǵy tamasha jeńisi týraly biletin bolady», dedi Memleket basshysy.
Qasym-Jomart Toqaev memleket tarapynan buqaralyq jáne kásibı sporttyń damýyna qolaıly jaǵdaı jasalatynyn aıtty. Bul – memlekettik saıasattyń basym baǵyty.
«Olımpıadadaǵy nátıje árqashan el damýynyń mańyzdy kórsetkishteriniń biri sanalǵan, aldaǵy ýaqytta da solaı bola bermek. Qazaqstan osy jarystarǵa qatysqan sportshylardyń sany jaǵynan 25-orynǵa taban tiredi. Biz aldyna maqsat qoıǵan ár eńbekqor jan óziniń qabilet-qarymyn kórsete alatyn, sonyń ishinde sportta kózdegen bıigine jetýi úshin mol múmkindikke jol ashatyn Ádiletti Qazaqstandy quryp jatyrmyz. Adal báseke, merıtokratııa, tártip pen jaýapkershilik, bul – úlken sporttyń da, kez kelgen qýatty memlekettiń de dińgegi. Ulttyń jasampazdyq qýatyn arttyrý respýblıkalyq referendýmǵa shyǵarylǵan jańa halyqtyq Konstıtýsııa jobasynyń negizgi mazmundyq ózegi bolyp otyr. Ata Zańdaǵy ádildik, tártipke baǵyný, tabıǵatty aıalaý, otanshyldyq qaǵıdattary memleket irgesin bekemdep, órkendeýdiń qozǵaýshy kúshine aınalady», dedi Memleket basshysy.
Prezıdenttiń pikirinshe, memleketterdiń damýy da úlken sportqa uqsas: kim aldyna bıik maqsat qoıady, tabandy eńbek etedi, birlesip jumys isteıdi, sol jetistikke jetedi.
«Búgin biz jeńiske jetýge bar kúsh-jigerin jumsap, jeke rekordtaryn jańartqan Mıhaıl men ulttyq qurama múshelerin quttyqtaımyz. Keıbir sportshylarymyz osyndaı aýqymdaǵy jarysqa alǵash ret qatyssa da, olar laıyqty óner kórsetti. Kóptegen sportshymyz ózderi synǵa túsken saıysta úzdik ondyqqa endi. Bul bolashaqtaǵy tabystarǵa jol ashady. Azamattarymyzdyń halyqaralyq deńgeıdegi jetistikteri, meıli, ol sportta nemese oqýshylar men stýdentter olımpıadasynda, ónerde, tipti basqa salalarda bolsyn, elimizdiń órkendep kele jatqanyn kórsetedi. Taıaýda Mılan men Kortınada Qysqy Paralımpıada oıyndary bastalady. Sportshylarymyzǵa sáttilik tileımin», dedi Qasym-Jomart Toqaev.
Olımpıada oıyndarynyń jabylý saltanatynda Qazaqstan týyn Mıhaıl Shaıdorov alyp shyqty
Memleket basshysy sózin qorytyndylaı kele, eki jyldan keıin atletterimiz Los-Andjeleste ótetin Jazǵy Olımpıada oıyndaryna qatysatynyn eske saldy.
«Týrızm jáne sport mınıstrligi, Ulttyq Olımpıada komıteti, federasııalar birlese jumys atqaryp, qurama múshelerin jan-jaqty qoldaýǵa tıis. 2029 jyly Almaty qalasynda ótetin Qysqy Azııa oıyndaryna erekshe nazar aýdarý qajet. Oıyndar eń joǵary deńgeıde uıymdastyrylýy kerek. Bul – Qazaqstandaǵy sporttyń damýyna tyń serpin berip, ekonomıka men týrızm salalaryna oń yqpal etetin óte mańyzdy is-shara», dedi Qasym-Jomart Toqaev.
Prezıdent XXV Qysqy Olımpıada oıyndaryndaǵy jetistikteri úshin Mıhaıl Shaıdorovty II dárejeli «Barys» ordenimen, bapkeri, jattyqtyrýshy-keńesshi Alekseı Ýrmanovty II dárejeli «Dostyq» ordenimen marapattady. «Qurmet» ordeni Qazaqstan Respýblıkasynyń mánerlep syrǵanaýdan ulttyq qurama komandasynyń bas jattyqtyrýshysy Ásem Qasanovaǵa, mánerlep syrǵanaýdan jattyqtyrýshy Stanıslav Shaıdorovqa, Qazaqstandyq konkımen mánerlep syrǵanaý odaǵynyń prezıdenti Baýyrjan Eralyǵa tabystaldy.
Olımpıada chempıony Mıhaıl Shaıdorov kórsetken qoldaýy úshin Qasym-Jomart Toqaevqa jáne barsha otandasymyzǵa rızashylyǵyn bildirdi.
«Qurmetti Qasym-Jomart Kemeluly! Bul kezdesýge Olımpıada chempıony retinde qatysý – men úshin zor mártebe. Altyn medal – meniń ǵana emes, ata-anamnyń, bapkerlerimniń jáne men úshin alańdap, qoldaý kórsetken barsha qazaqstandyqtyń jeńisi. Bul aıanbaı ter tógip jumys isteseń, jaqyn jandardyń mahabbaty men senimi bolsa, armandardyń oryndalatynyn kórsetedi. Prezıdent myrza, Sizdiń qoldaýyńyzdyń arqasynda sportshylar úlken jetistikterge, jańa tarıhı rekordtarǵa qol jetkizip júr. Men Olımpıada altynymen shektelmeımin. Aldymda uzaq jol bar. Elimniń senimin aqtap, jas urpaqqa úlgi bolyp, halqymyzdyń mereıin ústem etkim keledi. Rahmet Sizge! Súıikti Otanyma, Qazaqstanyma qyzmet etemin», dedi Mıhaıl Shaıdorov.