Qazaqstandyq sporttyq skalolazý ókili Rıshat Haıbýllın 2026 jyly Qytaıdyń Sanıa qalasynda ótken Azııa jaǵajaı oıyndarynda qola júldeger atandy, dep habarlaıdy Egemen.kz.
Rıshat jarystyń jeke saıysynda el namysyn qorǵap, jaqsy nátıje kórsetti.
1/8 fınalda ol óz komandalasy Damır Toqtarovty jeńdi. Keıin Qytaı sportshysy Szıan Gony da basyp ozdy.
Jartylaı fınalda Haıbýllın Indonezııa ókili Robbı Al Hılmıden jeńilip qaldy. Al qola medal úshin ótken saıysta Qytaı sportshysy Shoýhýn Chýdy 4.81 sekýnd nátıjemen jeńip, úshinshi oryndy ıelendi.
Áıelder arasyndaǵy Qazaqstan chempıonaty: 19 komanda basty júldege talasady
Sportshy Olympic.kz saıtyna bergen suhbatynda óz nátıjesine rıza ekenin aıtqan.
«Shynymdy aıtsam, óte rızamyn. Maýsymnyń basy sátti bolmady, formada bolǵan joqpyn. Biraq Azııa oıyndaryna deıin ózimdi qalypqa keltirip, jaqsy deńgeıge shyǵara aldym. Qazirgi daıyndyǵymmen eseptegende, óte jaqsy óner kórsettim. Qazaqstan rekordyn da, jeke rekordymdy da jańarttym, ári qola medal jeńip aldym.
Búgingi jarystardyń kóbin jaqsy ótkizdim dep oılaımyn. Fınalǵa shyǵýǵa múmkindik boldy, biraq bul sportta bári boljamsyz. Jartylaı fınalda qolym syrǵyp ketti. Soǵan qaramastan, jalpy nátıjemdi jaqsy dep baǵalaımyn.
Maǵan qarsylas kim ekeni asa mańyzdy emes, men ózimmen ózim básekelesemin, eń jaqsy nátıjemdi kórsetkim keledi. Endi demalyp, kúsh jınaý kerek. Erteń estafeta jarysy bar, odan ári kúresemin», dedi Haıbýllın.
Osylaısha Qazaqstan quramasynyń qorjynynda medal sany altyǵa jetti. Buǵan deıin Nurjan Batyrbekov altyn medal, áıelder quramasy sý doby boıynsha kúmis, al Batyr Teńizbaı, Seıilhan Bolatbek jáne Álınur Qýatuly djıý-djıtsýdan qola medal alǵan bolatyn.
Aıta keteıik, erler men áıelder arasyndaǵy estafeta jarystary 29 sáýirde ótedi. Irikteý kezeńi Astana ýaqytymen 05:30-da bastalady.