Foto: Aqorda
«Sizdiń parasatty ári myqty basshylyǵyńyzben IýNESKO dıalog pen yntymaqtastyq alańy retindegi rólin arttyra tústi. Jahanda baǵdarsyzdyq pen qaqtyǵystar beleń alǵan kezde Siz bilim men mádenıet beıbitshilikti nyǵaıtatyn mańyzdy qural ekenin udaıy dáleldep kelesiz. Elimizdiń baı tarıhı jáne mádenı muralaryna nazar aýdarý arqyly ózara seriktestikti keńeıtip, jańa deńgeıge kóterilýine yqpal ettińiz», dedi Memleket basshysy.
Qasym-Jomart Toqaev Odre Azýle Qazaqstannyń biregeı mádenı qundylyqtaryn, tarıhı eskertkishterin, zııatkerlik muralaryn saqtaýǵa jáne olardyń halyqaralyq deńgeıde tanylýyna erekshe úles qosqanyn atap ótti.
«IýNESKO-nyń bastamalary men baǵdarlamalary arqyly álemdik qoǵamdastyq Qazaqstannyń Qoja Ahmet Iаsaýı kesenesinen bastap, Uly dalanyń mádenı keńistigine deıingi qaıtalanbas muralarymen tanys boldy. Sondyqtan Sizge Qoja Ahmet Yasaui ordenin tapsyrý – men úshin zor mártebe. Siz Qazaqstanǵa, ásirese, halqymyz úshin orny aıryqsha Iаsaýı kesenesine qatysty úlken is atqardyńyz», dedi Qasym-Jomart Toqaev.
IýNESKO-nyń burynǵy Bas dırektory Memleket basshysyna joǵary marapat tapsyrǵany úshin alǵys aıtty.
«Prezıdent myrza, maǵan kórsetken aıryqsha qurmetińiz úshin rızashylyǵymdy bildiremin. Meniń Qazaqstanǵa alǵashqy saparym Qoja Ahmet Iаsaýı kesenesimen tyǵyz baılanysty. Bul orynnyń tarıhı ǵana emes, rýhanı qundylyǵyn tereń sezindim. Sol sebepti uly oıshyl atyndaǵy ordenmen marapattalǵanyma qýanyshtymyn», dedi Odre Azýle.
Eske sala keteıik, búgin Memleket basshysy Astanada «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmnyń ashylý saltanatynda sóz sóılep, Altyn Orda tarıhy kóptegen irgeli zertteýlerge arqaý bolǵanyn aıtty.
