Prezıdent Qasym-Jomart Toqaev Ál-Farabı, Iаsaýı jáne basqa da áıgili oıshyldar iliminiń Altyn Orda tusynda odan ári damı túsýi zańdylyq ekenin atap ótti, dep jazady Egemen.kz.
«Máselen, túrki tili, ıslamnyń kitabı dástúrleri men dalanyń sanǵasyrlyq danalyǵy dál osy kezeńde bir-birimen bite qaınasyp, ıdeologııalyq turǵydan aýqymy keńeıdi. Bul Altyn Orda kezeńiniń ádebıetinde kórinis taýyp, túrki halyqtarynyń sóz óneri qanat jaıǵan kezeń retinde baǵalandy. Halqymyz úshin Altyn Orda dáýirinen búginge deıin jetken «Aqsaq qulan» kúıiniń sımvoldyq máni zor», dedi Memleket basshysy.
Prezıdent bıyl kúıdiń shyqqanyna 800 jyl tolatynyn aıtyp, bul ańyz dombyranyń shanaǵynan shyqqan Uly Dalanyń úni, ultymyzdyń rýhanı baılyǵy ekenin tilge tıek etti.
«Ketbuǵa, Asan Qaıǵy, Shalkıiz jáne Dospambet sekildi jyraýlardyń murasy bizdiń aımaqqa tán dástúrli óner janrynda búginge deıin jetkeni kezdeısoq emes. Sol kezeńdegi jyrlarda (Er Edige, Alpamys, Qobylandy, Er Tarǵyn) batyrlardyń erlik joly men tarıhı oqıǵalar tizbegi jıi baıandalady. Bul – qazaq, tatar, bashqurt, noǵaı, qaraqalpaq jáne basqa da halyqtardyń ortaq qazynasy», dedi Qasym-Jomart Toqaev.
Eske salaıyq, Astanada «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıým ótip jatyr.