Italııanyń Bolonıa qalasynda ótken World Dog Show 2026 kórmesinde qazaqy tazy úlken jetistikke jetip, halyqaralyq kınologııalyq qaýymdastyqtyń joǵary baǵasyna ıe boldy. Kórme barysynda Qazaqstannyń ulttyq stendi eń tanymal alańdardyń birine aınaldy. Kelýshiler qazaqy tazynyń tarıhymen, erekshelikterimen jáne Qazaqstandaǵy tuqymdy saqtaý men damytý jumystarynyń nátıjelerimen tanysty, dep habarlaıdy Egemen.kz.
5-6 maýsym kúnderi ótken jarystarda qazaqy tazy Club Show 2026, ENCI Winner 2026 jáne World Dog Show 2026 kórmelerine qatysty. Barlyq usynylǵan ıtter «О́te jaqsy» degen baǵa alyp, otandyq kınologtardyń eńbegin dáleldedi.
Club Show 2026 kórmesinde Lashyn úzdik tuqym ókili atansa, ENCI Winner 2026 halyqaralyq jarysynda Pers jeńimpaz boldy. Pers óz jas sanatyndaǵy basqa tazy tuqymdarymen básekege túsip, tórtinshi orynǵa ıe bolyp, tarıhı nátıje kórsetti.
World Dog Show 2026 kórmesinde Lashyn taǵy da úzdik tuqym ókili atanyp, Chelsı men Tabıǵat «Jas álem chempıony», al Lashyn men Reıa «Álem chempıony» ataqtaryn jeńip aldy. Sonymen qatar birneshe qazaqy tazy Italııa chempıony jáne Jas Italııa chempıony ataqtaryna ıe boldy.
Qazaqstan alǵash ret bedeldi TOP Dog 2026 halyqaralyq shoýyna qatysyp, onda qazaqy tazy Daster tanystyryldy. Arenada Qazaqstannyń memlekettik týy kórsetilip, elimizdiń ataýy álemdik kınologııalyq qaýymdastyq aldynda jarııalandy.
Bul jetistikter qazaqy tazynyń halyqaralyq deńgeıde tanymal bola bastaǵanyn kórsetti. 2024 jyly Halyqaralyq kınologııalyq federasııa qazaqy tazyny aldyn ala moıyndap, Qazaqstandy tuqymnyń shyqqan eli retinde bekitken bolatyn. Bolonıadaǵy tabysty óner kórsetý qazaqy tazynyń tolyq halyqaralyq moıyndalýyna jasalǵan mańyzdy qadam boldy.