«Qazgıdromet» 8 maýsymda aýa raıyna baılanysty eskertý jarııalady. Elimizdiń basym bóliginde naızaǵaı, burshaq, qatty jel, shańdy daýyl jáne aptap ystyq kútiledi, dep habarlaıdy Egemen.kz.
Sınoptıkterdiń málimetinshe, Abaı, Aqtóbe, Atyraý, Batys Qazaqstan, Qostanaı, Soltústik Qazaqstan jáne Shyǵys Qazaqstan oblystarynda jańbyr jaýyp, naızaǵaı oınap, keı jerlerde burshaq túsýi múmkin. Jeldiń jyldamdyǵy sekýndyna 15-20 metrge deıin jetedi.
Jetisý, Qaraǵandy, Pavlodar jáne Ulytaý oblystarynda aýa temperatýrasy 35-37 gradýsqa deıin kóterilip, qatty ystyq bolady. Qyzylorda men Mańǵystaý oblystarynda shańdy daýyl kútiledi.
Sonymen qatar Astana, Shymkent jáne birqatar óńirlerde joǵary jáne tótenshe órt qaýpi saqtalyp otyr.
Mamandar turǵyndardy aýa raıynyń qolaısyz jaǵdaılaryna baılanysty saqtyq sharalaryn saqtaýǵa shaqyrdy.
Eske sala keteıik, «Qazgıdromet» usynǵan boljamǵa sáıkes, maýsym jáne tamyz aılary ádettegiden ystyq bolady. Qazaqstan aýmaǵynda aýa temperatýrasy klımattyq normadan 1-2 gradýsqa joǵary bolýy múmkin. Eldiń ońtústiginde keı kúnderi aýa temperatýrasy +45 gradýsqa deıin kóteriledi.