Ulytaý oblysy Qazaqstan boıynsha halyqqa qyzmet kórsetýdiń «Smart Point» sıfrlyq ozyq formatyn iske qosqan alǵashqy óńir boldy. Ulytaý oblysy ákimdigi men «Azamattarǵa arnalǵan úkimet» memlekettik korporasııasynyń birlesken ekojúıesi negizinde qurylǵan «Smart Point» sıfrlyq keńsesiniń ashylýyna oblys ákimi Dastan Ryspekov pen «Azamattarǵa arnalǵan úkimet» memlekettik korporasııasynyń Basqarma tóraǵasy Arman Kenjeǵalıev qatysty, dep habarlaıdy Egemen.kz.
Bul – memlekettik qyzmetterdi alýdyń sapasyn jańa deńgeıge kóterýge baǵyttalǵan zamanaýı ári ınnovasııalyq keńistik. Joba halyqtyń sıfrlyq saýattylyǵyn arttyrýǵa, elektrondyq qyzmetterdi ózdiginen paıdalaný mádenıetin qalyptastyrýǵa jáne azamattar men memleket arasyndaǵy ózara is-qımyldyń yńǵaıly, zamanaýı ári tehnologııalyq ortasyn damytýǵa baǵyttalǵan.
«Biz tek jańa býyndaǵy halyqqa qyzmet kórsetý ortalyqtaryn ashyp jatqan joqpyz. Biz memleket pen azamat arasyndaǵy baılanystyń jańa mádenıetin qalyptastyryp jatyrmyz. Aldaǵy ýaqytta Apple Store úlgisindegi mundaı ortalyqtar elimiz boıynsha kezeń-kezeńimen engiziledi. Infraqurylymnyń daıyndyǵyna qaraı Astana men Pavlodar qalalarynda da iske qosýdy josparlap otyrmyz», deıdi Memlekettik korporasııanyń Basqarma tóraǵasy Arman Kenjeǵalıev.
Smart Point – azamattarǵa operatorlardyń kómeginsiz memlekettik qyzmetterdi óz betinshe alýǵa múmkindik beretin zamanaýı joǵary tehnologııalyq keńistik. Mundaı tásil kútý ýaqytyn edáýir qysqartyp qana qoımaı, memlekettik sıfrlyq servısterdi qolaıly ári tıimdi paıdalanýǵa jańa múmkindikter ashady.
Ortalyq birneshe fýnksıonaldyq aımaqtan turady. Olardyń árqaısysy zamanaýı paıdalanýshylardyń qajettilikterin eskere otyryp jasaqtalǵan. Ekspress-aımaqta memlekettik qyzmetterdi ózdiginen alýǵa arnalǵan termınaldar ornatylǵan. Sonymen qatar qujattardy messendjerler men basqa da sıfrlyq baılanys arnalary arqyly jedel joldaýǵa múmkindik qarastyrylǵan.
Al sıfrlyq aımaq symsyz qýattaý qurylǵylarymen jáne joǵary jyldamdyqty skanerlermen jabdyqtalǵan. Bul kelýshilerge qajetti qujattardy jedel sıfrlandyryp, memlekettik aqparattyq júıelerge júkteýge múmkindik beredi. Saraptamalyq aımaq kúrdeli memlekettik qyzmetterdi mamandardyń súıemeldeýimen alýǵa arnalǵan.
Erekshe nazar sıfrlyq saýattylyqty arttyrý aımaǵyna aýdarylǵan. Munda ınteraktıvti ekran jáne oqyp-úırenýge ári demalýǵa qolaıly keńistik qarastyrylǵan. Turǵyndar bul jerde sıfrlyq daǵdylaryn tegin jetildirip, jańa elektrondyq servısterdi meńgerip, sıfrlyq memlekettiń múmkindikterin senimdi paıdalana alady.
164 mln teńge shyǵyn: Almatyda júk kólikterin zańsyz tirkegen HQKO-nyń qyzmetkerleri sottaldy
Ortalyqtyń basty maqsaty – turǵyndarǵa yńǵaıly, qoljetimdi jáne ashyq orta qalyptastyryp, sıfrlyq tehnologııalardy kúndelikti ómirge keńinen engizý.
«Búginde halyqqa memlekettik qyzmetterdi barynsha yńǵaıly ári qoljetimdi etý – basty mindettiń biri. Ulytaý oblysynyń respýblıka boıynsha mundaı formattaǵy jobany alǵash bolyp iske qosýy – biz úshin úlken jetistik ári óńirdiń sıfrlyq transformasııaǵa daıyn ekeniniń naqty kórinisi», dedi oblys ákimi Dastan Ryspekov.
Endi turǵyndar túrli qyzmetti bir jerden, kezeksiz ári zamanaýı formatta ala alady. Bul ýaqytty únemdeýge múmkindik beredi. Eń bastysy, azamattarǵa burynǵydaı ár mekemeni aralap, bank bólimshelerine baryp, tólem jasap júrýdiń qajeti bolmaıdy. Barlyq servıs qoljetimdi bolady.
Júrgizýshi kýáligi 400 myń teńge: Shymkentte HQKO qyzmetkerleri ustaldy
Ulytaý oblysy