Qarjylyq monıtorıng agenttigi «CVK» qarjy pıramıdasynyń qyzmetin toqtatty. Qazirgi ýaqytta Agenttiktiń aýmaqtyq departamentteri elimizdiń 14 óńirinde sotqa deıingi tergep-tekserý jumystaryn júrgizip jatyr, dep habarlaıdy Egemen.kz.
Joba ózin marketpleıs retinde tanystyryp, qatysýshylarǵa turaqty tabys ákeletin túrli ınvestısııalyq «dúken» paketterin satyp alý usynǵan. Saýda qyzmetin ımıtasııalaý maqsatynda jeke kabınette shyn máninde bolmaǵan taýarlarǵa qatysty oryndalǵan tapsyrystar men jetkizilimder kórsetilip, sol úshin vırtýaldy syıaqylar eseptelgen.
Negizgi nazar referaldyq júıege aýdarylǵan: qatysýshylarǵa jańa salymshylardy tartqany úshin aqshalaı bonýstar men baǵaly syılyqtar ýáde etilgen.
Agressıvti óńirlik marketıng pen aýqymdy jarnamalyq naýqannyń nátıjesinde uıymdastyrýshylar zańsyz shemaǵa shamamen 1,5 myń salymshyny tartqan.
Jobany ilgerletý maqsatynda jabyq úgit-nasıhat keshteri, keńselerdiń saltanatty ashylý rásimderi jáne jappaı tanystyrylymdar ótkizilgen. Atalǵan is-sharalar áleýmettik jelilerde keńinen jarııalanyp, halyqtyń senimin qalyptastyrý quraly retinde paıdalanylǵan.
«Aqsha qarajatyn shyǵarý krıptovalıýtalyq platforma arqyly júzege asyrylyp, keıin banktik shottarǵa aýdarylǵan. Agenttiktiń jedel sharalary nátıjesinde 474 myń USDT kólemindegi krıptoaktıvterge tyıym salyndy. Tergep-tekserý jumystary jalǵasyp jatyr. Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy», delingen aqparatta.
Aıta keteıik, buǵan deıin WhatsApp jelisinde top qurǵan «ENVIDA AI» qarjy pıramıdasyna qatysty tergeý bastalǵany týraly jazǵan bolatynbyz.