Búgin Astanada ótip jatqan sımpozıýmdaǵy sóılegen sózinde Memleket basshysy kóptegen bedeldi ǵalymdardyń pikirinshe, qazir Altyn Ordanyń aqsha júıesinde mán-mańyzy aıryqsha jańalyqtar ashylyp jatqanyn atap ótti, dep habarlaıdy Egemen.kz.
Prezıdenttiń aıtýynsha, arheologtar osy kezge deıin beımálim bolyp kelgen ondaǵan tıyn saraıyn tapty.
«Mamandardyń aıtýynsha, naǵyz órleý kezeńinde Altyn Ordada shamamen 28 mıllıon kúmis tıyn soǵylǵan. Qazirgi tańda memlekettik jáne jeke qordaǵy sol dáýirge tıesili tıyndardyń jalpy sany bir mıllıonǵa jetedi. Qazaqstannyń ulttyq valıýtasy – teńge ataýy ulystyń «dang» sózinen tamyr tartady. «Dengı» sóziniń túbiri de osy uǵymnan taraǵan bolýy múmkin», dedi Prezıdent.
Memleket basshysynyń sózinshe, buǵan jaı ǵana lıngvıstıkalyq sáıkestik retinde qaraýǵa bolmaıdy. Bul – keń baıtaq aımaǵymyzda paıda bolǵan aqsha júıesiniń Altyn Orda zamanynda jasalǵanyn kórsetetin naqty dálel.
«Altyn Orda Uly Jibek jolynyń soltústik tarmaǵyn túgel baqylaýda ustap, dalany qaýipsiz tasymal dálizi retinde damytty. Joshy Ulysynyń aýmaǵy arqyly jyl saıyn myńdaǵan tonna taýar ótip jatty. Atap aıtqanda: Qytaıdan – jibek, Úndistannan – dámdeýishter, Reseı jerinen – teri ónimderi, Eýropadan, Taıaý jáne Orta Shyǵys elderinen – qolóner buıymdary tasymaldandy», dedi Qasym-Jomart Toqaev.
Qasym-Jomart Toqaev: Joshy ulysynyń memlekettik basqarý júıesin muqııat zerdeleý qajet