Memleket basshysy Astanada ótip jatqan «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmnyń ashylý saltanatynda sóz sóıledi. Qasym-Jomart Toqaev sımpozıým – Altyn Orda men Uly dala tarıhyn zerdeleıtin túrli mektep ókilderiniń basyn qosyp otyrǵanyn, bul – óte mańyzdy ekenin atap ótti, dep habarlaıdy Egemen.kz.
«Uzaq jyldar boıy osy irgeli taqyrypty indete zerttegen reseılik ǵalymdardyń rólin atap ótken ádiletti bolar edi. Olar Altyn Ordanyń tynys-tirshiligin jan-jaqty sıpattaıtyn ǵylymnyń mol qoryn jınady. Sonymen qatar Altyn Orda taqyryby bir ǵana memlekettiń sheńberinde shektelip qalmaı, Qytaı, Mońǵolııa, AQSh, Úndistan, Pákistan, Japonııa, Qyrǵyzstan, О́zbekstan, Mysyr jáne birqatar Eýropa elderi zertteýshileriniń nazaryn aýdaryp, búkil álemdi sharlap ketti desek bolady», dedi Prezıdent.
Astanada halyqaralyq sımpozıým ótip jatyr: 20-dan astam elden delegasııa keldi
Memleket basshysynyń aıtýynsha, túptep kelgende, Altyn Orda jylnamasy – adamzatqa ortaq tarıh. Al Qazaqstan Altyn Orda tarıhyn álemdik jylnamanyń kúrdeli, san salaly kezeńi retinde qarastyrady.
«О́ıtkeni buǵan atústi qaraýǵa bolmaıdy. Olaı bolǵan jaǵdaıda álemdik tarıhtaǵy osyndaı biregeı qubylysqa qatysty ustanym ózgeredi. Al ol memleketter men halyqtar arasyndaǵy qarym-qatynasqa syzat túsirýi múmkin. О́kinishke qaraı, álemdik mańyzy bar iri tarıhı oqıǵalardy burmalaǵan mysaldar qazir de kezdesedi.
Geosaıası ahýal qubylyp turǵan búgingideı zamanda soǵystardyń qasiretti hronologııasyna baılanyp qalmaı, adamzat tarıhyndaǵy jasampaz kezeńder men dıalog alańdarynyń nátıjeli sátterine mán bergen jón», dedi Qasym-Jomart Toqaev.
Prezıdenttiń sózinshe, álbette, bul ońaı mindet emes. Sebebi tarlan tarıhtyń baǵzy dáýirlerden bastap qazirgi deıingi shejiresinde soǵystar men qarýly qaqtyǵystar óte kóp kezdesedi.
«Mundaı kórinistiń qalyptasýy da túsinikti: beıbit kúndegi kúıbeń tirshilikti sıpattaǵannan góri qan maıdandaǵy bitispes urystardy jazǵan áldeqaıda jeńil. Aıtpaqshy, Lev Tolstoıdyń ataqty «Soǵys jáne beıbitshilik» romany – beıbitshilikti emes, soǵysty egjeı-tegjeıli sýrettegen shyǵarma.
Álemdik qoǵamdastyq tarıhı jolaıryqta tur. О́rkenıetti tańdaý aldyndaǵy syndarly sátte ortaq tarıhymyzdy halyqtardy biriktiretin faktor retinde usyný úshin bedeldi, kásibı ǵalymdardyń kúshin bir arnaǵa toǵystyrǵan durys», dedi Memleket basshysy.
Prezıdent: Elimiz IýNESKO-nyń qoldaýymen kóptegen mańyzdy jobany júzege asyrdy