Almaty oblysy turǵyndary áleýmettik jelide taraǵan aýyr qylmysqa qatysty ádil tergeý júrgizýdi talap etip otyr. Marqum er adamnyń týystary kúdiktige taǵylǵan bapty qaıta qaraýdy suraǵan, dep habarlaıdy Egemen.kz.
Qaıǵyly oqıǵa 2026 jylǵy 23 aqpanda bolǵan. Marqumnyń qyzynyń aıtýynsha, ákesi kúrektiń ushymen moıyn tusynan aýyr soqqy alǵan. Saldarynan moıyn omyrtqasy synyp, kóp qan joǵaltqan.
«Sińlim oqıǵa ornyna jetken kezde ákem áli tiri edi. Biraq kúdikti men onyń týystary jedel járdem men polısııa shaqyrýdyń ornyna jarty saǵat boıy «keliseıik» dep ýaqyt sozǵan. Olar ákemdi sýyq jerde jatqyzyp qoıǵan», deıdi marqumnyń qyzy.
Onyń sózinshe, keıin er adam Uzynaǵash aýrýhanasyna jetkizilgen. Alaıda onda kompıýterlik tomografııa apparaty bolmaǵandyqtan, dárigerler tek alǵashqy kómek kórsetip, naýqasty Qalqaman aýrýhanasyna jetkizýdi usynǵan.
Týystarynyń aıtýynsha, aýyr jaraqat alǵan azamat jolda kóz jumǵan.
Marqumnyń jaqyndary istiń «abaısyzda ólimge ákelgen aýyr dene jaraqatyn salý» baby boıynsha tergelýine kelispeıdi. Olar qylmysty neǵurlym aýyr bappen qaıta saralaýdy talap etip otyr.
Al Almaty oblysynyń Polısııa departamenti bul derek boıynsha sotqa deıingi tergeý bastalǵanyn habarlady. Vedomstvo málimetinshe, kúdikti jedel izdestirý sharalary barysynda ustalyp, sot sanksııasymen qamaýǵa alynǵan.
«Tergeý barysynda barlyq qajetti tergeý áreketteri júrgizildi. Qylmystyq is materıaldary qadaǵalaýshy organmen kelisilip, máni boıynsha qaraý úshin sotqa joldandy», dep málimdedi polısııa.
Almaty oblystyq soty da istiń óndiriske qabyldanǵanyn rastady. Sońǵy sheshimdi sot shyǵarady.
Aıta keteıik, Shymkentte 23 jastaǵy qyz ýaqytsha ustaý ızolıatorynda kóz jumdy.
ShQO-da jantúrshigerlik jol apaty bolyp, úsh jas azamat oqıǵa ornynda qaza tapty.